Бишкек, 25.08.21. /Кабар/. Ички иштер министрлиги жана Башкы прокуратуранын кызматкерлери адам сатууга байланышкан кылмыш иштерин натыйжалуу иликтөө үчүн окуудан өтүшүүдө. Бул тууралуу ИИМдин басма сөз кызматы билдирет.
Маалыматка ылайык, 2021-жылдын 24-25-августунда Ысык-Көл облусунун Кош-Көл айылында Кыргызстандын Нарын, Чүй, Талас жана Ысык-Көл облустарынын прокуратуранын кызматкерлери жана ички иштер органдарынын тергөө кызматтарынын начальниктери үчүн "Адам сатууга байланыштуу кылмыштарды иликтөө жана соттук териштирүү, анын ичинде эл аралык кызматташуу жана адамдарды сатуунун курмандыктарына укуктук жана башка жардам көрсөтүү маселелери" аттуу эки күндүк практикалык-тренингдер өтүп жатат.
Тренингге ички иштер министрлигинин 29 кызматкери жана прокуратуранын 39 кызматкери катышууда.
Тренингдин жүрүшүндө катышуучулар адамдарды сатуу боюнча кылмыш иштерин иликтөөнүн жана тергөөнүн өзгөчөлүктөрү, эл аралык кызматташуу жана адамдарды сатуунун курмандыктарына укуктук жана башка жардам көрсөтүү боюнча өздөрүнүн маалымдуулугун жогорулатышат.
Тренингде Адамдарды сатуунун курмандыктарын кайра жиберүүнүн улуттук механизми, адамдарды сатуунун курмандыктарын аныктоо критерийлери, адамдарды сатуунун курмандыктарын эксплуатациялоонун белгилери, ошондой эле ИИМдин Криминалдык милиция кызматынын, Тергөө кызматынын жана Прокуратуранын адам сатууга байланыштуу кылмыштарга каршы күрөшүүдөгү ролу каралууда.
Окутууну БУУнун Баңгизат жана кылмыштуулук боюнча башкармалыгынын Программалык кеңсесинин техникалык колдоосу менен КР Ички иштер министрлиги жана Башкы прокуратурасы биргеликте уюштурушту.
КР ИИМдин Криминалдык милиция кызматынын Биринчи башкармалыгынын начальниги, милициянын полковниги М. Жумабаев, ошондой эле КР Башкы прокуратурасынын башкармалыгынын улук прокурорлору С. Камолидинов менен Т. Кудаяров, КР Жазык кодекси менен Жазык-процесстик кодексинин жаңы долбоорун түзүүчүлөр тренингди алып барышты.
Пикир
Оставить комментарий