Бишкек, 05.03.19 /Кабар/. Көк-Арт дарыясында (Таш-Булак айыл аймагы) суунун деңгээли көтөрүлгөнүнө байланыштуу Сузак районунда өзгөчө кырдаал абалы жарыяланды.
Маалыматка ылайык, Ынтымак айылындагы Благовещенка көпүрөсүнүн асты жагын суу жеп, дарыянын боюндагы калктуу конуштарга, айыл-чарба жерлерине, социалдык объектилерге коркунуч келтирген.
Жогорудагынын негизинде материалдык чыгымдарга жол бербөө максатында, Сузак районунун акими өзгөчө кырдаалдар абалын жарыялаган.
Өзгөчө кырдаалдар министрлиги суунун нугун буруу иштерин жүргүзүлүп жатат, 8 даана техника тартылган.
"Тартылган күчтөрдүн жардамында кечээ, 4-март күнү көпүрөнүн төмөн жагынан 200 м аралыктагы суунун нугу бурулуп, 100 м дамба таштар менен бекемделди. Ал эми бүгүн бекемдөө иштери улантылууда", - деди Абдишарип Бекилов, Жалал-Абад облусундагы өзгөчө кырдаалдарга чара көрүү боюнча механикалаштырылган базанын башчысы.
Учурда Көк-Арт дарыясынын агымы секундасына 15-17 кубметрди түзүүдө.
Пикир
Оставить комментарий