Канадада кыргыз жазуучуларынын "Сыйкырдуу көпүрө" аттуу балдар жыйнагы жарык көрдү

Бишкек, 02.12.24. /Акназик Тургунбаева - Кабар/. Канадада "Сыйкырдуу көпүрө" аттуу балдар үчүн котормолордун жыйнагы жарык көрдү. Бул тууралуу “Кабар” агенттигинде өткөн маалымат жыйынында котормолор жыйнагынын түзүүчүсү, КР Улуттук жазуучулар союзунун мүчөсү Наргиса Карасартова билдирди.

Анын айтымында, жыйнак учурда басылманын lulu.com сайтында жеткиликтүү жана кийинки айдын ичинде ал дүйнөдөгү бардык негизги китеп платформаларында жеткиликтүү болот.

“Китепти каалаган адам, кайсыл жерде жашабасын буйрутма кыла алат. Кийинки айда негизги китеп сайттарында, анын ичинде Amazon`до да жеткиликтүү болот”,-деди ал.

"Сыйкырдуу көпүрө" жыйнагы көп тилдүү. Анда Наргиса Карасартованын орус жана англис тилдерине которгон азыркы кыргыз авторлорунун ырлары жана аңгемелери камтылган.

КР билим берүү жана маданиятынын отличниги, КР Улуттук жазуучулар союзунун мүчөсү Бермет Алымбаеванын айтымында, китептердин кыргыз эли менен башка элдердин достук байланышын чыңдоодо, ошондой эле кыргыздын каада-салтын жана үрп-адаттарын жайылтууда орду чоң.

Алымбаева Наргиса Карасартова акыркы үч-төрт жылдан бери окурмандардын санын кеңейтүү, таланттуу кыргыз авторлорун эл аралык адабий аренага таанытуу максатында көркөм котормочулук менен алектенип келе жатканын белгиледи.

Ал кошумчалагандай, орус жана англис тилдериндеги котормолор кыргызстандык авторлорду мындан аркы жемиштүү эмгекке шыктандырат.

“Китеп буйрутмалардын санына карай басылып чыгат. Өзүбүзгө 50 нуска басып чыгардык. Анын ичинен 23 нускасы жыйнакка чыгармалары кирген авторлорго берилген. Калган 25 китепти китепканаларга таратууну пландап жатабыз”, - деп белгиледи Карасартова.

Ошондой эле ал анын котормолору менен көптөгөн акын-жазуучулар эл аралык сынактардын лауреаттары болгонун белгиледи.

Жыйнакка Кыргызстандан 22 жана Казакстандан бир автордун чыгармалары киргизилген. Анын ичинде Перисат Абдалиева, Назира Алмухамедова, Бермет Алымбаева, Бакытбек Арстаналиев, Бүбүйра Бектенова, Анастасия Буковская, Нурмамат Жоробаев, Алтынай Иманбекова, Лейла Карасартова, Лилия Аргинова (Карасартова), Бердибай Керерашиев (Гүлна Айашаев), Мариям Костригина, Сулайман Рыспаев, Кундузбүбү Маматова, Тыныбек Мейманалиев, Сиренкан Сарбалаева, Сайра Сейитова, Елена Усик, Жазгүл Чоткораева, Шойстай Равшан жана Үмүтай Эралиева бар.

Жыйнактын авторлорунун бири, КР Улуттук жазуучулар союзунун мүчөсү Лейла Карасартова белгилегендей, долбоордун максаттарынын бири кыргыз авторлорунун ысымдарын дүйнө жүзүнө таанытуу.

“Жыйнакка кирген ар бир эмгек тазалыкка, боорукердикке, жарыктыкка, сулуулукка үйрөтөт. Биздин авторлор чет элдиктерден эч кем калышпайт, кээ бир жагынан алардан ашып да кетишет. Китеп жарык жана түстүү болуп чыкты”, - деп жыйынтыктады Лейла Карасартова.