Бишкек, 26.10.24. /Кабар/. Дүйнөлүк банк тобунун жана Эл аралык валюта фондунун башкаруучуларынын жылдык жолугушуусунун алкагында министрлер кабинетинин төрагасынын биринчи орун басары Адылбек Касымалиев Дүйнөлүк банктын Европа жана Борбордук Азия аймактар боюнча вице-президенти Антонелла Бассани менен сүйлөшүүлөрдү өткөрдү.
Жолугушуунун жүрүшүндө тараптар Кыргызстан менен Дүйнөлүк банктын ортосундагы кызматташуунун негизги маселелерин, ошондой эле өнөктөштүктү мындан ары өнүктүрүү мүмкүнчүлүктөрүн талкуулашты.
Талкуунун негизги темаларынын бири Камбар-Ата ГЭС-1ди куруу, өзгөчө бул маанилүү долбоордун социалдык жана экологиялык аспектилеринин контекстинде болду.
Адылбек Касымалиев аймактын туруктуу өнүгүүсүн камсыз кылуунун маанилүүлүгүн белгилеп, долбоор Борбор Азия үчүн стратегиялык мааниге ээ экенин белгиледи.
“Камбар-Ата ГЭС-1 таза энергиянын булагы гана болбостон, бүткүл Борбордук Азиядагы экономикалык өсүштүн катализатору болуп калат. Биз социалдык жана экологиялык аспектилерге өзгөчө көңүл буруп, бул долбоорду эң чоң жоопкерчилик менен ишке ашырууга бел байладык”, - деди ал.
Антонелла Бассани Камбар-Ата ГЭС-1ди куруу долбоорун колдоорун билдирип, “долбоор дүйнөлүк коомчулуктун кызыгуусун арттырып жатканын” белгилеп, аны ишке ашырууга комплекстүү мамиле жасоо зарылчылыгы менен макул экендигин билдирди. Долбоор экономикалык реформалар үчүн мүмкүнчүлүктөрдү түзүп, улуттук экономиканын бардык тармактарына таасирин тийгизерин белгиледи.
“Дүйнөлүк банк бардык социалдык жана экологиялык факторлорду эске алуу менен Камбар-Ата ГЭС-1 долбоорун ишке ашырууда Кыргызстанга ар тараптуу колдоо көрсөтүүгө даяр”, - деп жыйынтыктады Антонелла Бассани.
Маалымат үчүн: Антонелла Бассани — Дүйнөлүк банктын Европа жана Борбор Азия аймагы боюнча вице-президенти. Бул кызматта ал Дүйнөлүк банктын аймак үчүн стратегиясын, билим жана каржылоо аракеттерин жетектейт.
Пикир
Оставить комментарий