Бишкек, 08.02.23. /Кабар/. Министрлер кабинетинин төрагасынын биринчи орун басары Адылбек Касымалиев президенттин Ысык-Көл облусундагы өкүлчүлүгүнүн кеңейтилген коллегиялык кеңешмесине катышты.
Жыйындын жүрүшүндө облустун 2022-жылдагы социалдык-экономикалык өнүгүү жыйынтыктары, ошондой эле үстүбүздөгү жылга карата пландары каралды.
Министрлер кабинетинин төрагасынын биринчи орун басары 2023-жылдагы иштин негизги багыттарын белгилеп, аймактын инвестициялык жана туристтик мүмкүнчүлүктөрүн белгиледи.
Коллегиялык отурумдун жыйынтыгында төмөнкү тапшырмалар берилди:
- айыл өкмөт башчыларын, акимдердин орун басарларын аттестациядан өткөрүү;
- айыл өкмөттөрүнүн жана айылдардын чегинде облусту өнүктүрүүнүн жылдык Планын иштеп чыгуу;
- ирригациялык системаларды тазалоо жана жазгы-талаа иштерине даярдоо иштерин жүргүзүү;
- туристтик сезонго даярдык көрүү боюнча иштерди жүргүзүү;
- «е-Кызмат», «Санарип аймак», «Инфодокс» маалыматтык системаларынын толук ишке киргизилишин камсыз кылуу;
- региондун азык-түлүк коопсуздугун камсыз кылуу, атап айтканда, базарларда жана дүкөндөрдө бааны турукташтыруу боюнча үзгүлтүксүз иш алып баруу;
- атаандаштыкка жөндөмдүү продукцияны экспорттоо боюнча долбоорлорду илгерилетүүгө өзгөчө көңүл буруу;
- “40 район – 40 товар” программасынын алкагында 40 бренд сунуштоо;
- аймактын инвестициялык паспортун кароого сунуштоо.
"Натыйжалуу ишибиз аркылуу гана калктын ишенимине ээ болуп, алардын жашоо деңгээлин реалдуу түрдө жакшырта алабыз», - деп жыйынтыктады сөзүн Адылбек Касымалиев.
Пикир
Оставить комментарий