Бишкек, 24.12.18 /Кабар/. Казакстан Маалымат жана коммуникация министрлиги социалдык түйүндөргө мониторинг жүргүзүү системасы боюнча комментарий берди.
Министрлик тараткан маалыматка караганда, ведомство 2017-жылдан бери “Улуттук маалымат айдыңына мониторинг жүргүзүүнүн автоматташтырылган системасын” түзүү боюнча иш алып барууда. Долбоор ММКларда жарыяланган мыйзамсыз маалыматтар менен катар терроризм, суидцид пропагандасын аныктоо жараянын жеңилдетүүгө багытталган.
Маалымат жана коммуникация министрлиги бул системаны түзүү боюнча казакстандык “Квант” илимий-иликтөө лабораториясы менен келишим түзүлгөнүн билдирди. Бул долбоор үчүн бюджеттен 1,7 миллиард теңге (5 миллион доллардын тегереги) бөлүнгөн.
Өткөн аптада Digital Revolution тобунун хакерлери Орусия ФСБсына таандык "Квант" илимий-изилдөө институтунун серверин бузушканын ырасташкан. Алар жарыялаган документте социалдык түйүндөргө мониторинг жүргүзүү системасы көрсөтүлгөн. Анын негизги максаты – каршылык маанайларды аныктоо жана анализдөө. Digital Revolution билдиргендей, "Квант" мындай системаны Казакстанда ишке ашыра баштаган. Би-Би-Синин орус кызматы бул үчүн Казакстан Маалымат жана коммуникация министрлиги 4,3 миллион доллар бөлгөнүн маалымдады.
АКШ 2018-жылы “Квантка” каршы санкция киргизген. Өлкө бийлиги орусиялык илимий-изилдөө институтун президенттик шайлоо алдындагы хакердик чабуулдарга тиешеси болушу ыктымал деп айыптоодо.
Пикир
Оставить комментарий