Бишкек, 19.11.24. /Акназик Тургунбаева – Кабар/. Казакстандын Актөбө шаарында Улуттук агрардык илимий-билим берүү борбору тарабынан “Казак жылкы чарбасы жана жем өндүрүү илим-изилдөө институту” түзүлдү. Бул тууралуу Казакстандын Айыл чарба министрлигинин басма сөз кызматы билдирди.
Ведомствонун маалыматына ылайык, жаңы институттун негизги милдеттери жылкынын асыл тукумдук сапатын жогорулатууга, жылкы чарбасын активдүү өнүктүрүүгө жана ата мекендик породаларды тышкы рынокко чыгарууга багытталган изилдөөлөрдү жүргүзүү. Бүгүнкү күндө институт өзүнүн алдына келээрки беш жылдын ичинде асыл тукум жылкылардын санын 6-7 пайызга көбөйтүү планын коюп жатат.
Министрлик костанай жана адай өңдүү жергиликтүү жылкы породаларын, ошондой эле эт-сүт багытындагы "мугалжар", "кушум" генотиптерин жана казактын "жабе" тибиндеги жылкыларын өстүрүү аймактарын кеңейтүү жана асыл тукум жылкыларын көбөйтүү иштеринин маанилүү милдети болуп жатканын белгиледи.
Бул максатта жылкылардын ар кандай генетикалык топтору жөнүндө маалыматтарды сактай турган маалымат банкын, урук жана эмбрион банкын түзүү, бээлерди жасалма уруктандыруу пункту менен иммундук-генетикалык лабораторияны куруу пландаштырылууда.
Ошондой эле адистерди даярдоо боюнча иштер жүргүзүлөт. Жылкылар үчүн атайын ветеринардык клиниканы түзүү ветеринардык тейлөөнүн деңгээлин бир топ жакшыртат жана жылкылардын саламаттыгын жана бакубаттуулугун жакшыртууга салым кошот.
Пландарды ийгиликтүү ишке ашыруунун негизги аспектиси чет элдик илимий борборлор, университеттер жана эл аралык стандарттагы лабораториялар менен интеграция болот.
Биргелешкен илимий-техникалык программаларды ишке ашыруу жана маалымат алмашуу казак жылкы чарбасына алдыңкы тажрыйбаны киргизүүгө жана аны эл аралык аренада атаандаштыкка жөндөмдүү кылууга жардам берет.
Пикир
Оставить комментарий