Кошумча нарк салыгы комиссиясы боюнча сот: Жактоочу отурумду үзгүлтүккө учуратты

Бишкек, 19.07.19 /Кабар/. Бишкек шаарынын Биринчи май райондук сотунда кошумча наркка салык комиссиясы боюнча соттун кезектеги отуруму өтүүдө.

Отурумда судья Эмиль Каипов төрагалык кылууда.

Азизбеков жана Мэлсовдун жактоочусу Азизбек Турдалиев отурумга бир саатка кечигип, кийин өзүн жаман сезип жаткандыгын шылтоо кылып отурумдан кетип калгандыгына байланыштуу сот акт толтурган.

“Бул кат жактоочулар институтуна жана Юстиция министрлигине жиберилет. Толтурулган актка прокурор жана катчы кол койгон. Турдалиевдин сотко баш ийбегендигине байланыштуу отурум үзгүлтүккө учурап, 26-июльга жылдырылды”, - дейт Каипов.

Эске сала кетсек, 2018-жылы УКМКнын кызматкерлери атайын операциянын жүрүшүндө чет элдик жалган фирмалардын (лжефирма) жасалма документтерин жана мөөрлөрүн аныкташкан. Мамлекетке карата келтирилген зыян 600 млн. сомду түзгөн. “Интеррустрейд” жана “Полларис” ЖЧКнун жетекчилери Б. Азизбеков жана А. Мэлсовдор КРнын Салык кызматынын жана Бажы кызматынын кызматкерлери менен сүйлөшүп алып, республикалык бюджеттен 393 млн.сом өлчөмүндөгү каражаттарды чыгарып, 239 млн. 183 миң 598 сом көлөмүндөгү салыкты төлөбөй коюшкан – жалпысынан 632 млн. 183 миң 598 сом.

Айыпталуучулар катары жалпысынан 13 адам каралууда: Баязит Азизбеков, Арстанбек Мэлсов, Алмазбек Сагынбеков, Кубанычбек Кумашов, Дильбара Боронбаева, Эсенгул Кенжебаев, Айнура Байгазиева, Максатбек Бекирова, Медетбек Рыскулов, Замирбек Ниязалиев, Арзыгул Өмүркулов, Сабырбек уулу Султан жана Алишер Ишматов. Алардын ичинде 6 салык кызматынын, 3 бажы кызматынын өкүлдөрү жана жеке жактар бар. Бардыгына алдамчылык беренеси боюнча жана атка минерлерге ээлеген кызматын кыянаттык менен пайдалануу беренелери боюнча айып тагылууда.