Бишкек, 27.02.20./Кабар/. Кыргызстандын маданият министри Азамат Жаманкулов менен Россиянын маданият министри Ольга Любимова жолугуп, быйыл эки өлкөдө өтүүчү Эриш-аркак жылын өткөрүү планын талкуулашты. Бул тууралуу КР Маданият, маалымат жана туризм министрлигинен билдиришти.
Жолугушууда эки министр бул демилгенин маанилүүлүгүн, ал саясий жана соода-экономикалык гана эмес, маданий-гуманитардык багыттагы кызматташтыкка чоң түрткү берерин белгилешкен.
Эриш-аркак жылынын алкагында өткөрүлө турган иш-чаралардын 70%ы маданий-гуманитардык иш-чаралар болот: Кыргызстандагы Россия кино күндөрү, Жеңиштин 75 жылдыгына арналган мааракелик иш-чараларды, саясий ишмер Исхак Раззаковдун 110 жылдыгын жана СССРдин Эл артисти Болот Миңжылкыевдин 80 жылдыгын утурлай Москвада эскерүү иш-чараларын өткөрүү, сүрөтчүлөрдүн көргөзмөлөрү ж.б. бир катар иш-чаралар каралган.
Эриш-аркак жылынын ачылышы бүгүн, 27-февраль күнү Мамлекеттик Кремль сарайында болуп өтөт.
Пикир
Оставить комментарий