Бишкек, 05.11.18. /Кабар/ Кыргызстанда зомбулук менен байланышкан кылмыштардын курмандыктарынын 95 пайызы аялдар. Бул тууралуу “Саясий чечимдерден иш-аракетке. Борбордук Азиядагы аялдарга жана кыздарга карата гендердик зомбулукту жок кылуу” аталышындагы субрегионалдык конференцияда белгилүү болду.
Үй-бүлөдөгү зомбулук кеңири тараган жана 15 жаштан 49 жашка чейинки аялдардын үчтөн бир бөлүгүн камтыйт. Аялдардын 7 пайызы кош бойлуу учурунда зомбулуктан жабыркашат. 30 жаштан өйдө курактагы аялдардын 3 пайызы сексуалдык зомбулукка кабылышат.
Өкмөттүк маалыматтарга караганда, 2013-жылы үй-бүлөдөгү зомбулукка болгон даттануулардын жарымынан азы сотко өткөрүлүп берилген. Анын ичинен 7 пайызы жазык кылмыш катары сотко өткөрүлгөн. Калгандары жазалоонун жумшагыраак түрүн камтыган административдик укук бузууларга тиешелүү болгон.
Үй-бүлөдөгү зомбулук жөнүндөгү улуттук статистикалык маалыматтар кылмыш иштери жана кризистик борборлордун маалыматтарына негизделет.
Үй-бүлөдөгү зомбулук окуяларынын саны жыл өткөн сайын көбөйүүдө. 2013-жылы 2 миң 327 үй-бүлөлүк зомбулук учуру катталса, 2017-жылы бул көрсөткүч 7 миң 53кө көбөйгөн.
2013-жылы стационардык медициналык мекемелерде 957 киши дарыланган. 2017-жылы бул сан 1527ге өскөн. Анын 77 пайызы аялдар болгон. Кризистик борборлор тарабынан чогултулган статистикалык маалыматтардын негизинде аялдардын 60 пайызы үй-бүлөдөгү зомбулукка байланыштуу жардам сурап кайрылышкан.
Бириккен Улуттар уюмунун өнүктүрүү программасынын соттук практика тууралуу 2012-2015-жылдардагы отчётуна ылайык, сексуалдык зомбулук фактысы боюнча 756 кылмыш иши козголгон. Бул иштер боюнча иликтөөлөр жүргүзүлгөн. Бирок баары соттук тергөөгө жетишкен эмес. Башкача айтканда, сексуалдык зомбулук боюнча иштердин көпчүлүгү жабылган.
Пикир
Оставить комментарий