Бишкек, 07.06.18. /Кабар/. 6-июнда Тажикстандын Бустон шаарында Кыргызстандын Мамлекеттик чек ара кызматынын делегациясы Тажикстандын Улуттук коопсуздук боюнча мамлекеттик комитетинин Чек ара аскерлеринин өкүлдөрү менен жолукту. Бул тууралуу Кыргызстандын Чек ара кызматынын маалымат бөлүмү кабарлады.
Кыргыз делегациясын Мамлекеттик чек ара кызматынын полковниги Уларбек Шаршеев жетектеп барды. Тажикстан тараптын делегациясын УКМКнын чек ара аскерлеринин жетекчиси Ражабали Рахмонали жетектеген. Эки тарап кыргыз-тажик чек арасындагы акыркы кырдаалды талкуулап, соңку учурда чек арада чыр-чатактар көбөйгөнүн айтып, тынчсызданууларын билдирди.
Алар Кыргызстандын Баткен облусундагы Лейлек районунун Максат айылында 4-июнда болгон окуяны иликтөөдө аскер адамдарынын аракеттери канчалык деңгээлде мыйзамдуу болгонуна баа берилери айтылып, мындай окуялардын алдын алуу боюнча көрүлүүчү чаралар жөнүндө сүйлөштү.
Жолугушууда чек арадагы инциденттер жаралган учурда такыр курал колдонбоо тууралуу чечим кабыл алынды. Жергиликтүү чек ара бөлүмдөрүнүн жетекчилигине эки өлкөнүн чек ара өкүлдөрү келмейинче активдүү чара көрбөө талабы коюлду. Жолугушуунун аягында жетишилген макулдашуулар камтылган протоколго кол коюлду.
Пикир
Оставить комментарий