Кыргызстан Бакуда өтүп жаткан СОР-29да туристтик мүмкүнчүлүктөрүн көрсөттү

Бишкек, 21.11.24. /Кабар/. Күн мурун Азербайжандын Баку шаарында өтүп жаткан БУУнун климаттык өзгөрүүлөр боюнча 29-Конференциясынын (СОР-29) алкагында туризмге арналган тематикалык күн өткөрүлдү. Бул тууралуу Кыргызстанда туризмди өнүктүрүүнү колдоо фондунан билдиришти.

Анын жүрүшүндө фонддун президенти Кылычбек Рысалиев инвесторлор үчүн кызыктуу туристтик долбоорлорду сунуштады. Ал Ысык-Көл облусундагы "Үч чоку" жыл бою иштегидей тоо курортунун, Чүй облусундагы "Байтик Маунтин Резорт" курортунун долбоорлору жана учурдагы ишке ашып жаткан RestPoint, туристтик кызмат көрсөтүү борборлору, GoBus автобустар тармагы, Ысык-Көлдөгү глэмпингдер, экологиялык жолдор сыяктуу долбоорлор жөнүндө айтып берди.

Рысалиев өз сөзүндө Кыргызстандын уникалдуу туристтик потенциалына, анын ичинде кышкы жана жайкы активдүү эс алуу түрлөрүнө, ошондой эле спорттук жана медициналык туризмге басым жасады. Ал туристтик тармакты өнүктүрүү табигый ресурстарды туруктуу пайдалануу принциптерине негизделип, жашыл технологияларды киргизүүгө басым жасала турганын белгиледи.

"Байтик Маунтин Резорт" долбоору жөнүндөгү сөзүндө фонддун жетекчиси курорт 50 кмден ашык лыжа жолдору, 22 телекабель, мейманкана комплекси жана башка инфраструктуралык объекттерди курууну камтыйт экенин белгиледи. Долбоорго киргизилүүчү инвестициялардын көлөмү 101 миллион евро дан ашат, ал эми кайтарым мөөнөтү — 7 жыл. Кылычбек Рысалиев бул курортту жыл бою иштетүүнү пландаштырууда жана ал 1 миллион туристке чейин тартылышы мүмкүн экенин айтты.

"Изилдөөлөр көрсөткөндөй, аймактык туристтик рынокто 30 миңге жакын лыжа тебүүчү бар. Бишкектен 4 сааттык учуу радиусунда 1 миллиарддан ашык адам жашайт, бул Кыргызстандагы туризмди өнүктүрүүгө чоң мүмкүнчүлүктөрдү ачат", — деп кошумчалады ал.

Туризмди өнүктүрүүнү колдоо фондунун президенти ошондой эле экологияны жакшыртууга жана туруктуу туризмди колдоого багытталган мөңгүлөрдү сактоо долбоору тууралуу айтып берди. Инициатива табигый аймактарга, анын ичинде "Байтик Маунтин Резорт" жана "Чаткал Резорт" долбоорлоруна инновациялык технологияларды киргизүүнү камтыйт, бул суу ресурстарын сактоого, экологиялык абалды стабилдештирүүгө жана региондун туристтик жагымдуулугун арттырууга жардам берет.