Бишкек, 06.11.24. /Кабар/. Кыргызстан ТМУнун аймагынын санариптик интеграциясын тездетүү максатын көздөйт. Бул тууралуу президент Садыр Жапаров бүгүн Түрк мамлекеттер уюмунун мамлекет башчыларынын 11-саммитинде билдирди.
Өлкө башчысы белгилегендей, бул максатка жетүү үчүн бир катар демилгелерди ишке ашыруу пландалып жатат.
"Бирдиктүү санариптик мейкиндикти түзүү жаатында биз электрондук сооданы жөнгө салууга, транспорттук жана логистикалык жол-жоболорду жөнөкөйлөтүүгө, санариптик стандарттарды жана сертификаттарды өз ара таанууга кызыкдарбыз.
Ошондой эле, электрондук кол тамгаларды өз ара таануу механизмдерин түзүүгө багытталган документтерди биргелешип даярдоого умтулабыз.
Төрагалыктын алкагында санариптик технологиялар жаатында, өзгөчө мамлекеттик кызмат көрсөтүү жана жасалма интеллект тармактарында биргелешкен изилдөөлөргө көмөк көрсөтүлөт", - деди президент.
Садыр Жапаров кесиптештерин Бишкек шаарына 2025-жылга Түрк дүйнөсүнүн санариптик борбору макамын ыйгаруу боюнча демилгени колдогондору үчүн ыраазычылык билдирди. Ошондой эле ал Кыргызстан мамлекеттик кызматтарды санариптештирүүдө олуттуу прогресске жетишкенин айтып өттү.
Мамлекеттик электрондук кызмат көрсөтүүлөр порталы жана анын мобилдик версиясы 2021-жылдан тартып ишкерлердин өкмөт менен өз ара аракеттенүүсү үчүн бирдиктүү платформа катары кызмат кылууда.
Бүгүнкү күндө портал 37 ар кандай мамлекеттик органдын жүздөн ашуун мамлекеттик кызматтарын сунуштап, ай сайын 1,5 миллион жаран кайрылат.
"Санариптик документтер мыйзамдуу күчкө ээ жана аларды учурда мобилдик тиркеме аркылуу колдонуу мүмкүн. Биз ошондой эле салыктык администрациялоону жана лицензиялоо процесстерин жөнөкөйлөтүп, аларды рыноктун бардык катышуучулары үчүн жеткиликтүү жана түшүнүктүү кылып жатабыз", - деп белгиледи мамлекет башчысы.
Пикир
Оставить комментарий