Кыргызстанда 2-июлга чейин туруксуз аба ырайы күтүлөт

Бишкек, 28.06.24. /Кабар/. Өзгөчө кырдаалдар министрлиги аба ырайына байланыштуу шашылыш билдирүү таратты.

Ага ылайык, бүгүн түштөн кийин жана 29-июндан 2-июлга чейин туруксуз аба-ырайына жана күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондорунда сел жүрүшү жана дарыяларда суунун деңгээли көтөрүлүшү күтүлөт.

Буга байланыштуу ӨКМ төмөндөгүдөй сел коопсуздук эрежелерин сактоону эскертет:

• арыктарды тазалап, жээгин бекемдеңиз жана таштанды таштабаңыз;
• турак үй жайгашкан жерде жаан суулары - агып өтүүгө ылайыкталган арыктын болушун камсыздаңыз;
• үй же сарай салууда, эгин айдоодо сел жүрүү кооптуулугу бар тилкелерге жакын эместигине өзгөчө көңүл буруңуз;
• сел учурунда дароо коопсуз жайга кетиңиз;
• мүмкүнчүлүк болсо үйдөгү свет, суу, газды өчүрүп чыгыңыз.