Бишкек, 08.02.23. /Кабар/. Кыргызстандык ишкерлер "Продекспо-2023" эл аралык көргөзмөсүнө катышууда. Бул тууралуу КР Тышкы иштер министрлигинен билдиришти.
Маалыматка ылайык, ата мекендик өндүрүүчүлөрдүн продукциясын илгерилетүү максатында Кыргызстандын Россиядагы элчилиги 2023-жылдын 6-10-февраль аралыгында Москвада өтүп жаткан "Продекспо- 2023" 30-юбилейлик эл аралык азык-түлүк көргөзмөсүндө КРнын Улуттук стендин ачууну жана кыргызстандык ишкерлердин катышуусун демилгелеген.
Көргөзмөгө КР Соода-өнөр жай палатасынын, Агроөнөр жай комплексинин ишканалар ассоциациясынын мүчөлөрүнүн ичинен 10го жакын кыргызстандык экспорттоочу компаниялар катышып жатат.
Көргөзмө экспозициясында Кыргызстандан жогорку сапаттагы органикалык кургатылган жемиштер, жаңгактар, ар кандай жашылчалар, мөмө-жемиштер, кургатылган мөмө-жемиштер, төө буурчак жана башка азыктар кеңири коюлду.
"Продекспо- 2023" көргөзмөсүнүн ачылыш аземине КР Соода-өнөр жай палатасынын "Кыргызэкспоборборунун" жетекчиси Н.А.Султанов, КР Соода-өнөр жай палатасынын Москва шаарындагы өкүлү М.И.Тумасов катышты.
Маалымат үчүн: "Продэкспо" – Россиядагы жана Чыгыш Европадагы эң ири эл аралык тамак-аш жана суусундук көргөзмөсү. Быйыл ага 35 өлкөдөн 2 миңден ашык компания катышууда. "Продэкспо - 2023" дүйнө жүзү боюнча алдыңкы өндүрүүчүлөрдүн жана жеткирүүчүлөрдүн тамак-аш жана суусундуктардын мыкты үлгүлөрүн тартуулайт.
Пикир
Оставить комментарий