Бишкек, 08.04.22. /Кабар/. АКШнын мамлекеттик катчысынын жарандык коопсуздук, демократия жана адам укуктары боюнча орун басары Узра Зея эл аралык майыптар укуктары боюнча атайын кеңешчи Сара Минкаранын коштоосунда 11-16-апрель күндөрү Казакстан жана Кыргызстанга сапар тартат. Бул тууралуу АКШнын Кыргызстандагы элчилигинен билдиришти.
Казакстанда катчынын орун басары Зея жогорку даражалуу өкмөт өкүлдөрү менен жолугуп, АКШ-Казакстан эки тараптуу өнөктөштүгүн бекемдөө жана көбүрөөк байланышта, гүлдөп-өскөн жана коопсуз Борбор Азияны түзүү маселелерин талкуулайт.
Нур-Султанга болгон сапарында катчынын орун басары адам укуктары боюнча жогорку деңгээлдеги жумушчу топтун инаугурациясына катышкан АКШ делегациясын жетектейт. Алматыдагы сапары учурунда катчынын орун басары Зея жарандык коом өкүлдөрүнүн Казакстандагы адам укуктары боюнча пикирин угат. Катчынын орун басары жолугушууларынын жүрүшүндө ар түрдүүлүктүн, инклюзивдүүлүктүн жана жеткиликтүүлүктүн, анын ичинде майыптыгы бар адамдар үчүн да маанилүүлүгүн баса белгилейт.
Катчынын орун басары Зея андан соң Бишкекке келет, ал жерде эки тараптуу жана глобалдык маселелер боюнча кызматташтыкты арттыруу жана демократиялык институттардын маанилүүлүгүн талкуулоо үчүн жогорку бийлик өкүлдөрү менен жолугушат.
Ал ошондой эле жарандык коомдун өкүлдөрү менен жолугуп, сөз эркиндиги жана Кыргызстандын жалпы калкы, анын ичинде мүмкүнчүлүгү чектелген адамдар үчүн болгон адам укуктары маселесин талкуулайт. Катчынын орун басары ошондой эле аялдардын укуктарын кеңейтүү үчүн саясий лидерлер жана бизнес өкүлдөрү менен иштешет.
Пикир
Оставить комментарий