Бишкек, 24.09.22. /Кабар/. Баткенде интернет байланыштын 70 пайызы калыбына келтирилди. Бул тууралуу "Кыргызтелеком" ААКсынын Баткен облусу боюнча башкармалыгынын жетекчиси Максат Мажитов "Кабар" маалымат агенттигиндеги брифингде билдирди.
Анын айтуусуна караганда, Тажикстандын Баткен облусуна куралдуу кол салуусунун натыйжасында 193 абонент интернетсиз калган. Анын айтымында, 16-сентябрда эртең менен негизги кабель бузулуп, резервдик радио шилтемелер аркылуу интернет жарым-жартылай жеткирилген.
"Баткен районунда 116 абонент түйүнсүз калган, анын 17си мектеп, базалык жана санариптик станциялар да жабыркаган. Лейлек районунда 77 абонент, анын ичинде 7 мектеп интернетсиз калган. Учурда калыбына келтирүү иштери жүрүп жатат. Бүгүнкү күндө бузулган техниканын 70% калыбына келтирилди", - деди Мажитов.
Эске сала кетсек, үстүбүздөгү жылдын 14-17-сентябрында Тажикстан куралдуу агрессия көрсөтүп, мурда сүйлөшүлгөн бардык макулдашууларга карабай, кыргыз-тажик мамлекеттик чек арасынын бардык периметри боюнча, тактап айтканда, Баткен облусундагы жана Ош облусунун Чоң-Алай районундагы чек аралык жана жарандык объекттерге чабуул жасады.
140 миңге жакын кыргызстандык чек арага жакын калктуу конуштардан эвакуацияланды.
Саламаттык сактоо министрлигинин маалыматына караганда, куралдуу кагылыштан 59 кыргызстандык (аскер кызматкерлери жана жай тургундар) каза болуп, 198 киши жабыркады.
Пикир
Оставить комментарий