Бишкек, 14.06.24. /Кабар/. Күн мурун, 13-июнда министрлер кабинети «2024-жылдын 6-июнунда Пекин шаарында кол коюлган Кытай өкмөтүнүн, Кыргызстандын министрлер кабинетинин жана Өзбекстан өкмөтүнүн ортосундагы «Кытай – Кыргызстан – Өзбекстан» темир жол долбоорун биргелешип илгерилетүүдө кызматташуу жөнүндө макулдашууну ратификациялоо тууралуу» мыйзамдын долбоорун Жогорку кеңештин кароосуна алып чыкты.
Документте белгиленгендей, темир жолдун курулушу "Кашгар — Торугарт — Макмал — Жалал-Абад — Андижан" маршрутунун айкалышкан варинаты боюнча жүзөгө ашырылат.
Жаңы темир жол коридору Евразия континенталдык көпүрөсүнүн түштүк бутагына айланат жана Түштүк-Чыгыш, Батыш Азия жана Жакынкы Чыгыштын рынокторуна жол ачат.
Бул каттам Кытайдан Кыргызстанга, ошондой эле, Борбор Азия жана Жакынкы Чыгыш өлкөлөрүнө, анын ичинде, Түркияга жана андан ары Евробиримдикке жүк жеткирүүнү камсыздай алат. Долбоор эл аралык рынокто жүктөрдү жеткирүүдө аралыкты жана убакытты кыскартуунун эсебинен транзиттик ташуулардын атаандаштыкка жөндөмдүүлүгүн жогорулатууну камсыз кылат.
Бул долбоорду ишке ашыруу Кыргызстандын экономикасын өнүктүрүүдө жалпы оң социалдык-экономикалык натыйжага ээ болот жана калкка көрсөтүлүүчү транспорттук кызматтарды кеңейтүүгө, транспорттук инфраструктураны жакшыртууга жана өнүктүрүүгө олуттуу көмөк көрсөтөт.
Пикир
Оставить комментарий