Бишкек, 09.01.25. /Кабар/. Рыскул Боромбаев Мамлекеттик "Учур" жаштар театрынын директору болуп дайындалды. Бул тууралуу Маданият, маалымат, спорт жана жаштар саясаты министрлигинен билдиришти.
Жаңы жетекчини эмгек жамаатына маданият министринин орун басары Тимурлан Ажымалиев тааныштырды.
Министрдин орун басары театрды өнүктүрүүнүн стратегиялык багыттарын жана быйылкы жылы театр үчүн жаңы имараттын курулушун баштоо негизги милдет экенин белгиледи. Бул долбоор мамлекеттик деңгээлдеги маданиятты жана жаштар чыгармачылыгын колдоо программасынын артыкчылыктуу багыты.
"Учур" жаштар театры ар дайым заманбап искусствонун өнүгүүсүнүн маанилүү аянтчасы болуп келген жана болуп калат. Биз жамааттын иши жана чыгармачылыгы үчүн заманбап шарттарды түзүү зарылдыгын жакшы түшүнөбүз. Ошондуктан театрдын жаңы имаратын куруу — биздин алдыдагы жылдагы негизги долбоорубуздун бири", — деди Тимурлан Ажымалиев.
Ошондой эле ал Рыскул Боромбаевдин дайындалышы театрды өнүктүрүү үчүн жаңы дем берүүчү кадам болооруна ишенимин билдирди. Министрдин орун басары жаңы жетекчиге чыгармачылык пландарды ишке ашырууда ийгиликтерди каалады.
Белгилей кетсек, Мамлекеттик "Учур" жаштар театры негизделген күндөн тартып эле жаңычылдык жана искусстводогу эксперименттердин символу болуп келет.
Пикир
Оставить комментарий