Бишкек, 25.10.22. /Кабар/. «Манас» эл аралык аэропортунда өлкөнүн жарандык авиациясынын күнүнө карата күзгү споттинг өткөрүлдү.
Аэропорттун басма сөз кызматынан кабарлашкандай, жыл сайын өтүүчү иш-чарага Кыргызстандан жана Россиядан 20га жакын учактарды тартууга кызыккан фотосүрөтчүлөр жана видеооператорлор чогулушту.
Ышкыбоз жана тажрыйбалуу споттерлер ишембинин түнү 4 саат бою учактар токтоп турган жайды, рулеждук жолчорлорду, учуу-конуу тилкесин жана перрондо учактарды тейлөө процессин сүрөткө тартышты. Ошондой эле, алар аэробекеттик комплексти ичи-сыртынан да тартканга үлгүрүштү.
Сүрөт сүйүүчүлөрү учактардын таңга маал учуп-конуусун тартып алуу мүмкүнчүлүгүн өзгөчө жогору баалашты. Споттерлердин айтымында, октябрь айы күнөстүү болгондуктан, алар чындыгында уникалдуу сүрөттөрдү жарата алышты.
Иш-чара авиациялык коопсуздук талаптарына ылайык өткөрүлдү.
Белгилей кетсек, споттингдин жыйынтыгы боюнча эң мыкты аталган сүрөттөр «Манас» аэробекеттик комплексиндеги көргөзмөдө көрсөтүлүп, аэропорттун расмий сайтында жайгаштырылат.
Маалымат үчүн: Споттинг (англ. spot – «кармап алуу») - учакты документалдык же көркөм сүрөткө тартуу. Анын максаты болуп учакты же авиацияга тиешеси бар объекттерди эң оригиналдуу түрдө сүрөткө тартып алуу болуп саналат. Жыл сайын биздин өлкөдө споттингтин күйөрмандары көбөйүүдө.
Пикир
Оставить комментарий