Бишкек, 06.06.24. /Кабар/. КР Коопсуздук кеңешинин катчысы Марат Иманкулов Казакстандын Алматы шаарында өткөн Жамааттык коопсуздук келишим уюмунун Коопсуздук кеңештеринин катчылар комитетинин кезектеги жыйынына катышты.
Иш-чаранын жүрүшүндө ЖККУнун жоопкерчилик чөйрөсүндөгү учурдагы чакырыктар жана коркунучтар жана аларды нейтралдаштыруу чаралары боюнча пикир алмашуу болуп, Уюмду мындан ары өркүндөтүү жана бекемдөө маселелери талкууланды.
Марат Иманкулов өз сөзүндө азыркы учурда жамааттык коопсуздук тутумуна терс таасирин тийгизген, ЖККУнун мамлекет башчылары тарабынан 2016-жылдын 14-октябрында бекитилген 2025-жылга чейинки мезгилге Жамааттык коопсуздук стратегиясында белгиленген дээрлик бардык факторлор курчуганын белгиледи.
Ал белгилегендей, чындыгында сегиз жылдын ичинде кырдаал эбегейсиз курчуп, ушу тапта ядролук жаңжал менен чектеш болуп калды. Террордук аракеттерге каршы туруу жаатындагы абал өтө кооптуу бойдон калууда. Эл аралык террористтик уюмдар бытыранды бандалык түзүмдөрдөн уюшкан тармактык түзүлүштөргө айланып, ар кандай мамлекеттерге кысым көрсөтүү үчүн прокси күч катары колдонулууда.
Марат Иманкулов белгилегендей, коопсуздуктун татаал жана өзгөрүп жаткан ландшафтын эске алуу менен терроризмге жана экстремизмге каршы аракеттенүү көйгөйлөрү баңги заттарын мыйзамсыз жүгүртүү, уюшкан кылмыштуулук, мыйзамсыз миграция жана ЖККУнун жоопкерчилик зонасындагы кырдаалга таасир этүүчү башка кыйратуучу факторлор сыяктуу эле өзүнө көбүрөөк көңүл бурууну талап кылууда.
ЖККУнун бекитилген документтеринде белгиленген зарыл чараларды өз убагында, жоопкерчиликтүү жана биргелешип ишке ашыруу, анын ичинде ЖККУнун дараметин тынымсыз жогорулатуу, аларды заманбап согуш шарттарында согуштук аракеттердин жаңы тактикасына жана өзгөчөлүктөрүнө үйрөтүү чакырыктардын жана коркунучтардын таасирине натыйжалуу жооп катары кызмат кылат.
Коопсуздук кеңешинин катчысы азыркы кырдаал ЖККУнун алкагында киберкоопсуздук, калктын (биринчи кезекте жаштардын) радикалдашуусуна каршы күрөшүү, адистештирилген кадрларды даярдоо маселелеринде, ошондой эле өз ара аракеттенүүнүн башка чөйрөлөрүндө кызматташтыкты кеңейтүүнү талап кылып жатканын белгиледи.
Маалымдама: Коопсуздук кеңештеринин катчылар комитети ЖККУнун улуттук коопсуздукту камсыз кылуу жаатында Уюмга мүчө-мамлекеттердин өз ара аракеттенүүсүн координациялоо маселелери боюнча консультативдик жана аткаруучу органы болуп саналат.
Пикир
Оставить комментарий