Бишкек, 23.12.24. /Кабар/. Бүгүн Жогорку соттун төрагасы Медербек Сатыев Ош облусу боюнча иш сапарын Алай райондук сотунан улантты.
Жогорку соттун басма сөз кызматынан билдиришкендей, төраганы Ош облустук сотунун төрагасы Мирлан Боромбаев, Алай райондук сотунун төрагасы Майрам Оморова жана Сот департаментинин Ош облустук башкармалыгынын башчысы Динислам Кожоакматов тосуп алышты.
Иш сапарында төраганы Жогорку соттун судьясы Маргарита Мельникова жана төраганын кеңешчиси Руслан Мырзалимов коштоп жүрүшөт.
Жогорку сот органынын башчысы сот жамааты менен кеңешме өткөрүп, анда сот адилеттигин ишке ашыруунун сапаты, сот чечимдеринин аткарылышы, сот аткаруучулар менен приставдар үчүн бардык мезгилдерге форманын бар экендиги жөнүндө сөз болду.
Белгилей кетсек, Алай райондук соту быйыл көчүп келген имарат 1982-1983-жылдары жол эксплуатациялоо жана курулуш башкармалыгындагы мекеме-ишканалар үчүн кеңсе катары курулган. Мөөнөтсүз пайдалануу укугу жөнүндө мамлекеттик актынын негизинде 2019-жылы Жогорку сотко караштуу Сот департаментинин Ош облустук башкармалыгынын балансына өткөрүлүп берилген.
Алай райондук сотунун имаратын капиталдык оңдоого жалпысынан 28 млн сомдон ашык каражат сарпталды.
Бүгүнкү күндө административдик имаратта 25 кызматкер эмгектенет. Алар эки судьядан, жети аппарат кызматкеринен жана сегиз техникалык жана кенже тейлөө кызматкерлеринен, ошондой эле үч сот аткаруучудан жана төрт сот аткаруучудан турат.
Пикир
Оставить комментарий