Бишкек, 26.10.17 /Кабар/. Өзбекстандын президенти Шавкат Мирзиёев Түркия жарандары үчүн виза алуу жараянынын жеңилдетилиши — эки өлкөнүн жакындашуусуна жасалган алгачкы гана кадам экенин билдирди. Бул тууралуу өзбек маалымат каражаттары жазышты.
«Биздин бир тууган элдин ортосунда виза болбогон күн да келет. Биз сөзсүз буга аракет кылабыз. 20 жылдын ичинде бири-бирибизди кандай сагынганыбыз көзүбүздөн көрүнүп турат. Азыр биз бири-бирибизди жарым сөз же көз караштарыбыз аркылуу гана түшүнүп жатабыз», – деди Шавкат Мирзиёев.
Быйылкы жылдын алгачкы тогуз айында эки өлкө ортосундагы товар алмашуу көлөмү дээрлик 30 пайызга өскөндүгүн белгилеген Өзбекстан президенти бул көрсөткүчтүн өтө аз экенин айтты. «Биз жогорку чектерди белгилешибиз керек. Мында кеп 2-3 миллиард доллар жөнүндө эмес, 5-6 миллиард доллар жөнүндө болушу керек», — деди Мирзиёев.
Андан тышкары 16-марттан тарта «Түрк аба жолдорунун» Стамбулдан Самаркандга уча баштай турганы белгилүү болду. Өз кезегинде «Өзбекстан аба жолдору» улуттук авиакомпаниясы бул багыт боюнча 30-октябрдан тарта туруктуу каттамдарды ачат. Жүргүнчү ташуучулар ортосунда Анкарада стратегиялык өнөктөштүк тууралуу макулдашууга кол коюлду.
Шавкат Мирзиёев Стамбулдагы бизнес-форумда 3,5 млрд долларлык 35 документке кол коюу пландалып жатканын билдирди. Режеп Тайып Эрдоган Өзбекстанды бардык тараптан стратегиялык өнөктөш деп, Шавкат Мирзиёевдин сапарын тарыхый окуя деп атады.
Пикир
Оставить комментарий