Бишкек, 28.06.24. /Кабар/. Бүгүн Нарында өтүп жаткан "Кыргыз шырдагы-XV" эл аралык фестивалында 200дөн ашык шырдак сынакка коюлду. Бул тууралуу президенттин аймактагы өкүлчүлүгүнөн билдиришти.
Фестиваль алгач Нарын районундагы As A Nomad этнокомплексинде улуу "Манас" баяны баштаган маданий иш-чара менен ачылып, кол өнөрчүлөрдүн салтанаттуу жүрүшү менен коштолду.
Иш-чаранын маданий бөлүгү "Кыргыз шырдагынын" 15 жылдык тарыхын камтыган видео тасма, театралдаштырылган оюн-зоок, "Сармерден" кыз-жигиттердин оюну программалары менен уланды.
Ошондой эле аркан тартыш, кол күрөш, таяк тартыш, тогуз коргоол, салбуурун сыяктуу улуттук оюндар, кол өнөрчүлөрдүн мастер-класстары, улуттук саркеч кийимдердин мода көргөзмөсү көрсөтүлдү.
Ушуга удаа эле "Алма-Бак" сейилбагында кол өнөрчүлүк буюмдарынын жана айыл чарба азык-түлүктөрүнүн жарманкеси өтүп жатат. Ошондой эле каалоочуларды туристтик турлар күтүүдө.
Фестивалдын салтанаттуу ачылыш аземи кечки саат 21:00до башталып, чоң программадагы гала концерт, фейерверк менен коштолот.
Эл аралык фестивалга Турция, Япония, Швейцария, Араб Эмираттары, Өзбекстан, Казакстандан меймандар жана Кыргызстандын аймактарынан келген 200гө жакын кол өнөрчүлөр катышууда.
Пикир
Оставить комментарий