Бишкек, 02.09.21. /Кабар/. Ош шаарында 3 көчөнү асфальттоо иштери жүрүп жатат, дагы 5 көчөнү асфальттоо пландалууда. Бул тууралуу Ош шаардык мэриясынын басма сөз кызматы билдирет.
Маалыматка ылайык, 1-сентябрда Ош шаарынын вице-мэри Жасур Азимов шаарда жүрүп жаткан жолдорду асфальттоо жана оңдоп-түзөө иштеринин жүрүшүн жеринен көрдү.
Анын алкагында Алиев, Достук кичи шаарчасындагы 51чи жана Мажрумтал көчөлөрүндө жүрүп жаткан иштерди текшерди.
Алиев көчөсүндөгү жолдун биринчи бөлүгүндө сугат лотокторун орнотуу иштери аяктап жатат, ири бүртүкчөлүү асфальттын биринчи катмары төшөлдү. Бул жерде бекемдөө иштери жана тротуарды асфальттоого даярдоо иштери жүргүзүлүүдө. Ошондой эле экинчи багытта суу түтүгүн өткөрүп берүү боюнча чаралардын комплекси көрүлүүдө, андан кийин жол тилкесин жана тротуарларды оңдоо иштери башталат. Жумуштун жалпы узундугу 0,9 км.
Достук кичи районунун 51-көчөсүндө жолду асфальттоо иштери аяктап, учурда жолдун эки жээгин бекемдөө чаралары көрүлүүдө. Бул жерде жолдун жалпы узундугу 0,5 км, туурасы 5 м, жумуштун тендердик баасы 2,3 млн сомду түзөт.
Мажрумтал көчөсүндө учурда тротуарды жана жолду асфальттоо, лотокторду орнотуу боюнча даярдык иш-чаралары жүрүп жатат. Сентябрдын биринчи жарымында аяктайт.
Ал эми 2021-жылга Төлөйкөн айылынын Ражапов көчөсүнүн, "Курманжан-Датка" МАБындагы Бобулов көчөсүнүн, Ак-Тилек кичи районундагы N16 көчөнүн, Тээк айылынын Алибеков көчөсүнүн, Татар айылынын Алиев көчөсүнүн жолдорун асфальттоо иштери жүрөт.
Ошондой эле "Туран" МАБындагы Ирригатор көчөсү, Анар кичи шаарчасындагы азиздер жана дүлөйлөр коомунун аймагын асфальттоо, тротуарларды жана лотокторду иретке келтирүү иштери болот. Жалпысынан быйыл 5 чакырымга жакын жолду асфальттоо пландалууда.
Пикир
Оставить комментарий