Бишкек, 21.11.20. /Кабар/. Ош шаарында 30-ноябрдан тарта 1-класстын окуучулары мектептерге бара башташат. Бул тууралуу Ош шаарынын мэриясынан билдиришти.
Кечээ, 20-ноябрь күнү Ош шаарынын мэриясында вице-мэр Эмил Шадыхановдун башчылыгы алдында шаардык жарандык коргонуунун штабынын жыйыны болуп өтүп, анда 1-класстын окуучуларынын мектепке келип окуу маселеси каралган.
Жыйында Ош шаарынын саламаттыкты сактоо боюнча координатору Кыялбек Ташполотов, шаардык санитардык-эпидемиологиялык кызматтын өкүлдөрү шаардагы санитардык-эпидемиологиялык кырдаал жөнүндө маалымат беришкен. Статистикалык маалыматтарга ылайык, бүгүнкү күндө Ош шаарында эпидемиологиялык кырдаал турукташкан.
Жыйындын соңунда штаб, 1-класстын окуучуларына мектепке баруусуна уруксат берген.
“Ошондой эле, менчик мектептер жана бала бакчалар бардык зарыл болгон санитардык-эпидемиологиялык нормалар менен эрежелерди так сактоо менен иштей тургандыгын белгилейбиз. Эрежелердин сакталышын санитардык-эпидемиологиялык кызматтын адистери көзөмөлдөйт”, - деп айтылат маалыматта.
Мэриядан белгилешкендей, Ош шаарындагы мамлекеттик бала бакчалар азырынча ачылбайт.
Ош шаарында 55 мамлекеттик жана 26 жеке менчик мектеп бар. Аларда 77 миң 832 окуучу билим алат.
Пикир
Оставить комментарий