Бишкек, 14.11.24. /Кабар/. Бүгүн Ош шаарында Бүткүл дүйнөлүк жаштар күнүнө карата "Келечек багыты – Жаштардын өнүгүү платформасы" аталышындагы жаштар форуму болуп өттү. Бул тууралуу муниципалитеттен билдиришти.
Иш-чарага Ош шаарынын мэринин орун басары Нурбек Кадыров, мэриянын жаштар иштери боюнча комитеттин төрагасы Жаныш Жусупбеков, "Интербилим" коомдук уюмунун облустук бөлүмүнүн башчысы Гульгакы Мамасалиева, жаштар уюмдарынын өкүлдөрү, өлкөнүн ар кайсыл аймактарынан келген жаштар катышты.
Иш-чаранын алкагында Ош шаарынын жаштар иштери боюнча комитетинин ишмердүүлүгү тууралуу маалыматтар берилди.
Ошондой эле Бүткүл дүйнөлүк жаштар күнүнө жана Эл аралык студенттер күнүнө карата жаштар саясатына колдоо көрсөтүп, салым кошкон айырым жарандар, активдүү жаштар Ош шаарынын мэриясынын Ардак грамотасы жана ыраазычылык баракчалары менен сыйланды.
Форумдун катышуучуларына ийгиликтүү долбоорлор боюнча жаш ишкерлер жана экологиялык активисттер тарабынан презентациялар көрсөтүлдү. Мындан тышкары, жаштардын шайлоо процесстерине катышуусунун маанилүүлүгү тууралуу түшүндүрүлдү.
Пикир
Оставить комментарий