Бишкек, 28.02.19. /Кабар/. Бүгүн Ош шаарынын мэриясында шаарды жашылдандыруу, көрктөндүрүү жана санитардык тазалоо боюнча жазгы 3 айлыкты өткөрүү боюнча штабдын жыйыны болду. Ага Ош шаарынын вице-мэри Асылбек Топчубаев, шаардык кеңештин депутаттары, мекеме ишканалардын жетекчилери, муниципалдык аймактык башкармалыктардын башчылары жана тийиштүү жетекчилер катышты.
Жыйында Ош шаарынын аймагында жашылдандыруу, көрктөндүрүү жана санитардык тазалоо боюнча жазгы үч айлык жарыяланып, аны өткөрүү боюнча пландар талкууланды. Анда вице-мэр Оштогу ишканалардын, мекемелердин, уюмдардын аймактык башкармалыктардын жана «Жапалак» айылдык аймактык башкармалыгынын жетекчилерине 3 айлыктын алкагында өткөрүлүүчү иш-чаралардын планын иштеп чыгууну тапшырды.
Ошондой эле шаардын аймагын жакшыртуу, санитардык тазалыгын сактоо, массалык ишембиликтер уюштуруу, көрктөндүрүү жана жашылдандыруу,каналдарды тазалоо, аялдамаларды оңдоо, сырдоо, сырткы көрүнүштөрүн талапка ылайык абалга келтирүү, жарнамаларды иретке келтирүү талаптары коюлду.
Көрктөндүрүү жана жашылдандыруу чарба комбинатынын жетекчиси Айгүл Наватова шаарда бак-дарактардын көчөттөрүн отургузуу, гүл бакчаларды жана газондорду өстүрүү, ошондой эле шаардын аймагындагы арыктарды тазалоо иштери башталганын билдирди.
“Өзүңүздөргө маалым болгондой 2018-жылы Ош шаарынын аймагына 1,6 млн.эгилген болсо, быйылкы жылы 2 миллион гүл эгилет. Ошондой эле, 3 миң түп жазы жана ийне жалбырактуу көчөттөр, 37 миң бадам көчөтү отургузулат. Ар бир мекеме-ишкана, соода-сатык түйүндөр, көп кабаттуу жана жеке менчик үйлөр биздин комбинат тарабынан отургузулган гүлдөрдү гана карап отура бербестен, өзөрүнүн короолоруна гүл эгүүнү сунуштайм”,-деди А.Наватова.
3 айлыктын негизинде Ак-Буура дарыясынын жээктэрин тазалоо боюнча атайын иш-чаралардын планы бекитилет.
«Шаарыбызда жалпысынан 400 дөн ашуун ар кандай деңгээлдеги көчөлөрүбүз бар. Алардын бардыгынын тазалыгын камсыз кылуу ар бирибиздин милдетибиз. Ошондуктан шаарыбыздын борбордук, башкача айтканда «Ош-Тазалык» атайын адистештирилген муниципалдык ишканасынын кароосундагы көчөлөрдөн башка негизги көчөлөргө шаарыбызда жайгашкан мекеме-ишканалардын (менчигинин түрүнө жана ведомстволук баш ийүүсүнө карабастан), билим берүү жана саламаттыкты сактоо тармактарынын жетекчилери жооптуу болуп бекитилди. Алардын милдети ошол көчөлөрдүн тазалыгын ар дайым көзөмөлгө алуу жана аны камсыз кылуу. Бул үч айлыктын жыйынтыгы мекемелер, уюмдар, ишканалар, муниципалдык аймактык башкармалыктар, кварталдык комитеттер, көп кабаттуу жана жеке үйлөр арасында чыгарылып, эң мыкты жыйынтык көрсөткөндөргө атайын сыйлыктар тапшыралат”, - деди А.Топчубаев.
Пикир
Оставить комментарий