Бишкек, 22.09.23. /Кабар/. Үстүбүздөгү жылдын 30-сентябрында Ош шаарынын борбордук аянтында жеңил атлетика боюнча массалык жарыш өтөт. Бул тууралуу Ош шаардык мэриясынын басма сөз кызматынан кабарлашты.
Жарышка катышууну каалаган жарандар 30-сентябрь, саат 08:00дө “Түбөлүк от” мемориалдык комплексинин жанында катталышса болот.
Ал эми мекеме-ишканалардын табыштамалары 2023-жылдын 29-сентябрына чейин Ош шаардык дене тарбия жана спорт комитетинин калыстар тобу тарабынан кабыл алынат.
Жөө күлүктөр төмөнкү жаш категориялар боюнча сыналат:
- мектеп окуучулары;
- студенттер;
- күч түзүмдөрүнүн өкүлдөрү;
- 25-65 жаштагы жарандар.
Жарыш 400, 500, 1500 жана 2200 метр аралыкта өтөт.
Байланыш телефондор: (03222) 7-06-99, 5-63-78.
Ош шаардык мэриясынан жарышка дарыгердин уруксаты бар адамдар гана катыша аларын эскертишти.
Жеңүүчүлөр эркектер жана аялдар арасында ар бир топ боюнча өзүнчө аныкталат. 1,2,3-орунду ээлеген катышуучулар Ош шаардык дене тарбия жана спорт комитетинин баалуу белектери, дипломдору жана медалдары менен сыйланышат.
Мектеп окуучулары менен студенттерге да баалуу сыйлыктар каралган.
Пикир
Оставить комментарий