Бишкек, 21.02.23. /Кабар/. Бүгүн, 21-февралда ОшМУнун жыйындар залында Эне тилинин эл аралык күнүнө арналган “Мамлекеттик тил – достуктун жана биримдиктин тили” деген аталыштагы майрамдык иш-чара өттү.
Окуу жайдын басма сөз кызматы билдиргендей, иш-чара Ош шаарынын мэриясы, Ош мамлекеттик университети (ОшМУ) жана Кыргызстан калкы ассамблеясынын Ош бөлүмү тарабынан уюштурулган.
Майрамдык салтанатка Ош шаарынын вице-мэри Сонунбек Жунусбаев, Кыргызстан элдер ассамблеясынын Ош шаарындагы филиалынын төрагасы Балтагул Нурумбетов, ОшМУнун окуу иштери боюнча проректору Замирбек Божонов, Оштогу ар улуттун өкүлдөрү, профессордук-окутуучулук жамааты, студенттер катышты.
Кечеде Ош мамлекеттик университетинин таланттуу окутуучуларынын, студенттеринин, Ош шаарындагы диаспора өкүлдөрүнүн тил, маданият, улуттук нарк, улуттук идеология, адеп-ахлак, достук, ынтымак, улуттар аралык урмат-сый маселелерин өз ичине камтыган концерттик программасы тартууланды.
Жыйынтыгында активдүү катышуучуларга Ош шаарынын мэриясынын дипломдору, баалуу белектери жана акчалай сыйлыктары тапшырылды.
1999-жылдын 17-ноябрында ЮНЕСКОнун Башкы конференциясы тарабынан жарыяланган Эне тилинин эл аралык күнү 2000-жылдан бери тилдик жана маданий көп түрдүүлүктү жана көп тилдүүлүктү өнүктүрүү максатында жыл сайын белгиленип келет.
Пикир
Оставить комментарий