Бишкек, 06.09.22. /Кабар/. 15-17-сентябрда Ош шаарында Соода-экономикалык кызматташуу боюнча 10-өкмөттөр аралык Беларус-Кыргыз комиссиясынын жыйыны, бизнес-форум жана “Түштүк Экспо-2022” көргөзмө-жарманкеси өтөт. Бул тууралуу Ош шаардык мэриясынын басма сөз кызматынан билдиришти.
Маалыматка ылайык, мэрияда аталган иш-чараларды өткөрүү боюнча уюштуруу комитетинин жыйыны өтүп, анын алкагында тиешелүү кызматтарга иш-чараны уюштурууга жана өткөрүүгө ар тараптуу көмөк көрсөтүү тапшырмасы берилди.
Беларусь делегациясынын башында Беларусь Республикасынын премьер-министринин орун басары А. Сивактын келиши күтүлүүдө. Ал министрлер кабинетинин төрагасынын орун басары Бакыт Төрөбаев, жергиликтүү өз алдынча башкаруу органдарынын жетекчилери менен жолугушууларды өткөрөт.
Соода-экономикалык кызматташтык боюнча Беларусь-Кыргыз өкмөттөр аралык комиссиясынын 10-отурумунун жыйынтыгы боюнча тиешелүү Протоколго кол коюлат.
Ошондой эле шаардын ири өнөр жай ишканаларына барып, анын ичинде “Кыргыз унаа курулуш” заводу менен таанышуу болот.
Пикир
Оставить комментарий