Оштогу билим берүү мекемелеринде “Манас жумалыгы” башталды

Бишкек, 06.12.17. /Кабар/. Ош шаарындагы билим берүү мекемелеринде 4-8-декабрь күндөрү “Манас жумалыгы” өтөт.

Ош шаардык билим берүү башкармалыгы билдиргендей, бул жумалык “4-декабрь – Манас күнүнө” байланыштуу уюштурулуп жатат.

Аталган жумалыктын алкагында бала бакчаларды тарбияланып жаткан балдар арасында «Манасым – менин мурасым» аттуу ураанда манас айтуу, “Манас – балдардын көзү менен” аттуу сүрөт тартуу жарышы жана анын галереясын уюштурулат.

Ал эми, мектептерде “Манас жумалыгынын” алкагында алп манасчы С. Орозбаковдун 150 жылдыгы жыйынтыкталып, дагы бир залкар манасчы Ж. Мамайдын 100 жылдыгын утурлай көргөзмөлөр, талкуулар уюштурулат. Андан сырткары мектеп окуучуларынын арасында “Аталардын алгы сөз, айтылбаса дат басат” аттуу беш багыт боюнча төмөндөгүдөй сынактар өтмөкчү:

1-багыт: Манас айтуу (1-11-класстардагы жаш манасчылардын ортосундагы жарыш);

2-багыт: Интеллектуалдык таймаш (8-10-класстардын “Манас таануу” таймашы);

3-багыт: Сүрөт тартуу (Эпостогу философия, андагы көрүнүштөрдү боюнча сынак);

4-багыт: Аткаруучулук өнөр (көркөм окуу жана сахналык көрүнүштөр);

5-багыт: Долбоор жактоо (“Манасты” жайылтуу боюнча долбоорлордун жарышы).

Шаардык билим берүү башкармалыгынын билдирүүсүндө, мектептерде өтүп жаткан бул сынактардын шаардык баскычы Ош шаарынын мэриясынын макулдугу менен жакынкы арада уюштурулмакчы.

Эске салсак, 2015-жылдын 27-апрелинде КРнын Өкмөтүнүн “Манас” эпосунун күнүн 4-декабрда белгилөө жөнүндөгү атайын токтому чыккан.