Париждеги Олимпиадада Үзүр Жусупбеков 3-орун үчүн күчүн сынайт

Бишкек, 06.08.24. /Мээрим Дүйшөналиева - Кабар/. Париждеги Олимпиада оюндарында балбан Үзүр Жусупбеков 3-орун үчүн күчүн сынайт.

Үзүр Жусупбеков коло медаль үчүн күрөшүүгө мүмкүнчүлүк бере турган көңүл жубатуучу беттеште 97 кг салмак ченинде америкалык Жозефь Патрик Рау менен кез келип, 9:4 эсебинде жеңишти камсыздады.

Эми ал коло медаль үчүн мелдеште египеттик Мохамед Габр менен беттешет.

Жусупбеков чейрек финалда ирандык Мохаммадхади Сарави менен кез келип, кармаш 8:0 эсеби менен иран спортчусунун пайдасына чечилген болчу. Ал эми 1/8 финалда кыргызстандык балбан литвалык Миндаугас Венскаитисти 5:1 эсебинде уткан.