Бишкек, 24.09.24. /Кабар/. Президенттин “ЖМК жана журналистика жаатындагы КР президентинин жылдык сыйлыгын белгилөө жөнүндө” жарлыгына ылайык, сынакка эмгектерди кабыл алуу уланууда.
Белгилей кетсек, сыйлыктын негизги максаты – илим, билим, медицина, маданият, спорт, экономика, экология, туризм, айыл чарба, өнөр жай тармактарында эмгектенген журналисттердин чыгармачылык ишмердүүлүгүн колдоо жана жетишкендиктерин баалоо. Сыйлык ошондой эле ар кандай тармактарда чыгармачылык активдүүлүккө стимул берет.
Сыйлыкка катышуунун шарттары:
- Сынакка Кыргыз Республикасынын жарандары катыша алат.
- Бир катышуучу үч категориядан ашык эмес арыз бере алат.
- Сынакка берилген материалдарга карата автордук жана чектеш укуктардын сакталышы үчүн жоопкерчилик толугу менен сыйлыкка арыз берген катышуучуларга жүктөлөт.
- Материалдар үстүбүздөгү жылдын 1-январынан 1-октябрына чейин жарыяланууга тийиш.
- 2024-жылы сынакка сунушталган иштер meikin@mail.gov.kg электрондук дареги боюнча үстүбүздөгү жылдын 1-октябрына чейин электрондук түрдө кабыл алынат.
Сыйлыктын лауреаттарын жарыялоо Маалымат жана басма сөз күнүнө арналган расмий иш-чарада, бардык номинанттарды чакыруу менен салтанаттуу өткөрүлөт.
Номинациялар:
- “Бир эл – бир түндүк”
- "Керемет Кыргызстан"
- “Салык – Өнүгүүгө салым”
- "Таза Мекен"
- "Билим – келечек"
- "Куттуу элет"
- "Мекен жана мен"
- "Мекендештер"
- "Кыргызстанда чыгарылган (Made in KG)"
- "Сергек жашоо"
Эскерте кетсек, сынактык иштерди кабыл алуунун аякташына 7 күн калды.
Сыйлыкка арыз берген катышуучулар тастыктаманы 0312 557315 телефону аркылуу алышы керек; 0550 739 550; 0558 581 258.
Пикир
Оставить комментарий