Бишкек, 07.04.21. /Кабар/. Президент Садыр Жапаров өзүнүн "Телеграммдагы" баракчасы аркылуу ата-бабалардын элесине жана эрдигине таазим этүүгө чакырды.
Мамлекет башчысы бүгүн Бишкек шаарындагы Жеңиш паркында жайгашкан "Өчпөс оттун" жалынын өчүргөн жигит кармалгандагы жагдайга байланыштуу өз оюн билдирген.
"Бир нече бала Жеңиш аянтындагы "Түбөлүк от" менен ойноп, аны өчүрүп жаткан видеону көрүп, жүрөгүм ооруду. Биздин балдарыбызтарыхыбызга, баалуулуктарыбызга кайдыгер мамиле кылып, вандализмге барып жатышканы өтө кейиштүү.
Мына жакында дүйнөдө 9-май белгиленет. Бул күн - боордош республикалардын бардык тургундары сыяктуу эле биз – кыргызстандыктар үчүн дагы өзгөчө күн. Бул биздин мурасыбыз, биздин азабыбыз жана сыймыгыбыз. Бул күндү биз эч качан унутпай, эстеп турушубуз кажет жана мындай балээ эч качан үйүбүздө, Мекенибизде болбошу үчүн колдон келгендин баарын жасашыбыз керек.
Биз фашизмди жеңдик, бирок бүгүнкү күндө балдарыбызды тарбиялоодо уттуруп жатабыз.
Жогорудагыдай окуялар кайталанбашы керек. Бул биздин тарыхыбызга, мурасыбызга жана ата-бабаларыбыздын эрдигине жасалган чыккынчылык.
Албетте, бул балдарды табабыз. Бирок жазалоо үчүн эмес, аларга өз иш-аракеттеринин пастыгын түшүндүрүү үчүн табабыз.
Коомубузда мындай балдар бар, демек биз же тарбияда, же билим берүүдө бир нерсени эстен чыгарып жатабыз же бир нерсеге көңүл бурбай жатабыз. Андыктан, биз ушул багытта көп иштешибиз керек. Балдар биздин тарыхыбызды жөн эле билип тим болбостон, ата-бабаларынын эрдиктеринин баасын, баркын толук аңдап түшүнүшү керек, алар менен сыймыктанышы зарыл! Бул биз умтулуп жаткан маданий жана адеп-ахлактык тарбия менен ажырагыс байланышта.
Достор! Быйыл биз Улуу Жеңиштин 76 жылдыгын жана Улуу Ата Мекендик согуштун башталышынын 80 жылдыгын белгилейбиз! Мен баардыгыңыздарды бизди тынчтык дүйнөдө жашашыбыз үчүн өз өмүрлөрүн берген, ден соолуктарын курмандыкка чалган ата-бабаларыбыздын элесине жана эрдиктерине таазим этүүгө чакырам!".
Пикир
Оставить комментарий