Садыр Жапаров Шавкат Мирзиёевди туулган күнү менен куттуктады

Бишкек, 24.07.24. /Кабар/. Бүгүн, 24-июлда президент Садыр Жапаров Өзбекстандын президенти Шавкат Мирзиёев менен телефон аркылуу сүйлөштү.

Сүйлөшүүнүн жүрүшүндө Садыр Жапаров Шавкат Мирзиёевди туулган күнү менен куттуктап, бекем ден соолук, көөнөрбөс энергия жана мамлекеттик ишмердигине ийгиликтерди каалады.

Мамлекет башчылары кыргыз-өзбек эки тараптуу кызматташтыгынын актуалдуу маселелери боюнча пикир алмашып, өлкөлөр ортосундагы ар тараптуу стратегиялык өнөктөштүктү мындан ары тереңдетүү жана кеңейтүү боюнча биргелешкен аракеттерди талкуулашты.

Бул контекстте тараптар Кыргыз Республикасынын Президенти Садыр Жапаровдун жакында Өзбекстан Республикасына жасаган ийгиликтүү мамлекеттик сапарын, анын жыйынтыгы достук жана өз ара аракеттенүү мамилелерин мындан ары чыңдоого жаңы дем берерин белгилешти.

Өзбекстандын президенти Шавкат Мирзиёев бүгүн, 24-июлда 67 жашка толду.