Салык кызматы студенттер арасында интеллектуалдык оюн өткөрдү

Бишкек, 13.12.24. /Кабар/. Мамлекеттик салык кызматы Бишкекте жогорку окуу жайлардын студенттеринин арасында интеллектуалдык оюн өткөрдү.

Ведостводон маалымдашкандай, ага жалпы жети команда катышты.

Оюн саламдашуу, эрудиттердин конкурсу жана лидерлердин сынагынан турган үч этап менен өттү.

Биринчи этап берилген теманын негизинде видеолорду даярдоону камтыйт. Экинчиси блиц-суроолор форматында өттү, анда командалар салык жана экономикалык маселелер боюнча жооптордун ылдамдыгы жана тактыгы боюнча таймашты. Лидерлер сынагында команданын капитандары жеке лидерлик жөндөмүн жана салык тармагындагы терең билимин көрсөтүштү.

Ар бир этап студенттердин потенциалын ачууга, салык аспектилерин жана экономикалык саясатты үйрөнүүгө болгон кызыгуусун арттырды.

Калыстар тобунун мүчөлөрү студенттердин жогорку деңгээлдеги даярдыгын, активдүүлүгүн жана командалык духун баса белгилешти.

Оюндун жыйынтыгында жеңүүчүлөргө акчалай сертификаттар жана баалуу белектер тапшырылды.

Мындай иш-чараларды региондук деңгээлде өткөрүү пландаштырылууда, бул келечекте жаш адистерди тартууга жана алардын салыктык сабаттуулугу боюнча компетенцияларын жогорулатууга мүмкүндүк берет.