Бишкек, 14.04.23. /Кабар/. Кыргызгидромет борбору аба ырайына байланыштуу шашылыш билдирүү таратты.
Синоптиктердин билдирүүсүнө таянсак, 15-апрелде жана 16-17-апрель күндөрү өлкө аймагында абанын температурасы кескин өзгөрүп, суук түшөт. Өлкөнүн көпчүлүк аймактарында мезгил-мезгили менен жамгыр жаап, күн күркүрөшү, тоолуу райондордо кар жаашы күтүлөт.
15-апрелде күндүз Ош, Жалал-Абад, Баткен облустарынын айрым жерлеринде, 16-апрелде түнкүсүн Чүй, Талас, Ош, Жалал-Абад, Ысык-Көл облустарынын айрым аймактарында жаан-чачын катуу жаайт. Батыштан соккон шамалдын ылдамдыгы кээ бир жерлерде секундасына 17-22 метрге жетет.
17-18-апрелде абанын температурасы төмөндөп Чүй өрөөнүндө түнкүсүн 1…6, күндүз 6…11, Талас өрөөнүндө түнкүсүн 1…6, күндүз 5…10, Ош, Жалал-Абад, Баткен облустарынын өрөөндөрүндө түнкүсүн 3…8, күндүз 8…13 градус болот. Ысык-Көл ойдуңунда түнкүсүн 1…6 (айрым жерлерде 0…-2), күндүз 6…11, Нарындын дыйканчылык аймактарында 1…6 (айрым жерлерде -1…-3), күндүз 6…11 градус жылуу, тоолуу райондордо түнкүсүн -11…-16 градуска сууктайт.
Мындай суук аба ырайы жайыттарда малды кармоону, автоунаа, энергетика жана коммуналдык кызматтардын ишин кыйындатат. Бактардын гүлдөрүнө, бүчүрлөрүнө, гүлдөгөн жемиштерге, жерге отургузулган жашылчаларга зыянын тийгизиши мүмкүн.
Пикир
Оставить комментарий