Бишкек, 18.01.23. /Кабар/. Сузак милициясы денеге оор залал келтиргени үчүн издөөдө жүргөн жаранды кармады, деп билдирет Жалал-Абад облустук ички иштер башкармалыгынын басма сөз кызматынан.
Маалыматка ылайык, өткөн жылы 18-октябрда Сузак районунун 47 жаштагы тургуну Д.К. ушул эле райондун 1955-жылы туулган тургуну Ж.М.ди уруп, денесине оор залал келтирген.
Жогорудагы окуя боюнча Сузак РИИБдин тергөө кызматы тарабынан Сузак районунун 67 жаштагы тургуну Ж.М.нын арызынын негизинде КР Кылмыш-жаза кодексинин 130-беренесине ("Ден соолукка оор залал келтирүү") ылайык кылмыш иши козголгон.
Аталган кылмыш ишинин алкагында 3-январда шектүүгө карата издөө жарыяланып, издөө иштери башталган.
Сузак РИИБдин жана ИИМдин 7-Башкы Башкармалыгынын ыкчам кызматкерлери тарабынан жүргүзүлгөн издөө, ыкчам иликтөө иштеринин натыйжасында үстүбүздөгү жылы 17-январда Сузак районунун 1975-жылы туулган тургуну (мурда ИИМде уюшкан кылмыштуу топтун мүчөсү катары каттоодо турган) Д.К. кармалып, райондун убактылуу кармоочу жайына киргизилген.
Учурда кылмыш иши боюнча тергөө иштери улантылууда.
Пикир
Оставить комментарий