Бишкек, 28.09.21. /Кабар/. Таласта милиция кызматкерлери мыйзамсыз ок атуучу куралдарды сактап жүргөн жаранды кармашты. Бул тууралуу Талас облустук милициясынын басма сөз кызматы билдирди.
Маалыматка ылайык, милицияга Талас шаарынын тургуну “Ж” аттуу жаран өзү жашаган үйдө мыйзамсыз ок атуучу куралдарды, ок-даарыларын сактап жүргөндүгү боюнча маалымат түшкөн.
Аталган маалымат Талас шаардык милициясынын кылмыштардын жана жоруктардын бирдиктүү реестрине катталып, КР Жазык кодексинин 253-беренесинин 2-бөлүмүндө каралган кылмыштын белгилери менен сотко чейинки өндүрүш иши ачылган.
Милиция кызматкерлеринин ыкчам аракеттеринин натыйжасында шектүү адамдын өздүгү такталып, ал Талас шаарынын тургуну 1993-жылы туулган К. уулу Ж. экендиги аныкталган, анын үйүн тинтүү учурунда мал сарайынан 1 даана “ИЖ-18Е” үлгүсүндөгү 12 калибрлүү курал, 1 даана 16 калибрлүү курал, 1 даана кесилип атайын даярдалган кесилген мылтык (обрез), гильза жана бычак табылып алынган.
Алынган курал-жарактар боюнча соттук-баллистикалык экспертиза дайындалып, тергөө амалдары жүрүп жатат.
Учурда кармалган жаран тергөөдө сурак берүүдө.
Пикир
Оставить комментарий