Бишкек, 28-март /Кабар/. 25-27-мартта Ташкентте көп үндүү ансамблдердин жана улуттук аспаптардын оркестрлеринин III эл аралык “Нооруз обондору” фестивалы өттү. Бул тууралуу КР ТИМ басма сөз кызматы билдирди.
Алардын маалыматы боюнча, иш-чарага өзбек музыкалык мектептеринин ансамблдери жана оркестрлери, ошондой эле Казакстан жана Тажикстан өкүлдөрү катышты.
“Кыргызстандын атынан М.Абдраев атындагы жатак мектебинин жана Бишкек маданият жана туризм башкармалыгына караштуу Ж.Шералиев атындагы №6 балдардын музыкалык искусство мектебинин аткаруучулары катышты” , - деп билдиришти ведомстводон.
Ошондой эле, басма сөз кызматы иш-чаранын жыйынтыгы боюнча кыргыз эл аспаптар ансамблине 1-орун жана 1-даражадагы Лауреат наамы ыйгарылганын билдирет.
Жыйынтыктоочу гала-концертине КР элчиси Данияр Сыдыков жана Өзбекстан Республикасынын «Соглом авлод учун» (Саламат муун үчүн) эл аралык кайрымдуулук фондунун төрагасы Светлана Инамова катышты. С.Инамова өз кезегинде кыргыз делегациясына иш-чарага катышуусу үчүн ыраазычылык билдирип, мындан аркы кызматташууга ишеним билдирди.
Пикир
Оставить комментарий