Бишкек, 19.10.17 /Кабар/. Тажикстандын Гафуров районунда базарда соода кылган жубайларды белгисиз кишилер өлтүрүп кетишти. Согди облусунун Ички иштер башкармалыгы билдиргендей, окуя 17-октябрда болгон.
Кылмышкерлер алгач жубайлардын ооздорун скотч менен чаптап кыйнашкан, муну менен акча катылган жер тууралуу маалымат алууга аракет жасашканы болжолдонууда. Баскынчылар коңшу бөлмөдөгү маркумдардын баласына тийген эмес.
Тергөөнүн кызыкчылыгы үчүн өлгөн жарандардын аттары жана башка кеңири маалыматтар айтылган жок.
Гафуров районунда бир нече жыл мурун зер буюмдарын сатуу менен алектенген үй-бүлө дагы ушундай окуяга кириптер болгон. Анда кылмышкерлер жубайларды үч кичине баласы менен өлтүрүп, алтын жасалгаларды жана 30 миң долларды алып, үйдү өрттөп кетишкен. Кылмышкерлер бир жылдан кийин кармалышкан.
Укук коргоо органдарынын маалыматы боюнча кылмышкерлер бул жолу дагы ири көлөмдө акча тоноо үчүн ушундай кадамга барышкан. Окуянын бетин ачуу үчүн ыкчам-иликтөө тобу түзүлдү.
Пикир
Оставить комментарий