Тажикстандагы ири көмүр кени боюнча соттук териштирүүлөр уланууда

Бишкек. 26.04.19 /Кабар/. Тажикстандын Жогорку экономикалык сотунда өлкөдөгү эң ири көмүр кени эсептелген «Назарайлок» кенин иштетүү укугуна байланышкан соттук териштирүүлөр уланууда.

Талаш Тажикстандын Инвестициялар жана мамлекеттик мүлктү башкаруу башкармалыгы менен аталган кенди 1994-жылдан бери иштетип келаткан «Камароб» акционердик коомунун ортосунда болууда.

«Назарайлок» кенинин акцияларынын 52 пайызына ээлик кылган Мамлекеттик мүлктү башкаруу башкармалыгы анын калган 48% акциясын «Камароб» компаниясынын ээлеринен сатып алып, аны мамлекеттик ишкана кылууга ниеттенип жатат. Бул талаш өкмөткө чейин жетип, ага өлкөнүн вице-премьери дагы кийлигишкени кабарланууда.

Бирок Өнөр-жай жана жаңы технологиялар министрлиги «Камароб» компаниясынын лицензиясы узартылып, ишкана ишин улантышы керек деп эсептөөдө. Мекеме өкмөткө жолдогон катында «Камаробдун» техникалык жана кадрдык мүмкүнчүлүктөрүн эске алуу менен ишкананын лицензиясын узартууну сунуштаган. «Аймактагы абалга карабастан, «Камароб» компаниясы 1997-2000-жылдары 100 чакырым жол, 8 автоунаа көпүрөсүн курган. 2008-жылдан 2017-жылга чейин 116 миң 150 тонна көмүр саткан», — деп жазылган министрликтин катында.

​Мурдараак 52 пайыз акциясы менен чечим кабыл алуу укугуна ээ болгон Мамлекеттик мүлктү башкаруу башкармалыгы «Камароб» компаниясынын директору Мурод Хушвактовду кызматтан алып, анын ордуна Обидхуджу Шариповду дайындаган.

Компаниянын мурдагы директору алар ишкана имаратына кире албай калганын жана лицензиянын жарактуу мөөнөтү токтотулгандан кийин 120 киши жумушсуз калганын билдирди. «Акционерлер ишканага салынган 52 миллион сомони (5,5 миллион доллар) каражаттын төлөнүп берилишин каалап жатышат. Бул боюнча Мамлекеттик мүлктү башкаруу башкармалыгы азырынча жарытылуу жооп бере элек. Мекеме өкмөткө жөнөткөн катында «Камароб» жолдордун курулушуна салынган каражат боюнча негизсиз далилдерди келтирип, акцияларды мамлетке берүүнү каалабай жатканын жазган», — деди Хушвактов.

Азырынча «Камароб» компаниясынын акцияларына байланышкан бул талаштын качан чечилери белгисиз. Учурда кенде иш токтоп, ондогон жумушчулар ишсиз отурушат.