Бишкек, 2-август /Кабар/. Кыргыз Республикасынын Премьер-министри Сооронбай Жээнбеков Түрк Республикасынын Премьер-министринин Аппаратына караштуу Кызматташуу жана өнүктүрүү боюнча түрк башкармалыгынын (ТИКА) Кыргызстандагы программалык координатору Эврен Рутбилди ишмердигинин аякташына байланыштуу кабыл алды. Бул тууралуу Өкмөттүн маалымат кызматы билдирди.
Премьер-министр Кыргызстан ТИКА менен биргеликте евразиялык аймакта ишке ашырган долбоорлордун саны боюнча алдыңкы катарда экендигин белгиледи.
«Кыргыз Республикасы эгемендик алгандан бери ТИКА мамлекетке 60 млн АКШ долларынан ашуун суммага жардам көрсөттү. Тактап айтканда, Бишкек шаарынын № 1 ооруканасынын аймагында кардиология жана гастроэнтерология бөлүмдөрү жайгашчу Кыргыз түрк достугунун ооруканасын куруу, Мамлекеттик тарых музейин калыбына келтирүү сыяктуу долбоорлор туралуу сөз болуп жатат. Муну менен бирге ТИКАнын көзөмөлү алдында рыноктук инфраструктура жана биздин өлкөдөгү эркин рынок экономикасынын өнүгүүсүнө арналган 40тан ашуун долбоорлор жана 300дөн ашуун иш-чаралар ишке ашырылган», — деп белгиледи Премьер-министр Сооронбай Жээнбеков.
ТИКАнын программалык координатору Эврен Рутбиль өз кезегинде ал Кыргызстандагы программалык координатор кызматында Кыргыз Республикасынын Өкмөтүнүн колдоосуна таянганын айтып, мындан ары да эки өлкөнүн ортосундагы өз ара пайдалуу кызматташтыктын өнүгө беришине бардык салымын кошо турганын ишендирди.
Маектешүүнүн соңунда Премьер-министр Сооронбай Жээнбеков Кыргыз Республикасындагы ТИКАнын программалык координатору Эврен Рутбилди Кыргыз Республикасынын Өкмөтүнүн Ардак грамотасы менен сыйлады.
Пикир
Оставить комментарий