Бишкек, 02.07.24. /Кабар/. "Бүгүн бизде Кыргызстан менен Бириккен Улуттар Уюмунун өз ара аракеттенүү жана кызматташуу маселелерин кеңири талкуулоо мүмкүнчүлүгүнө ээ болдук", - деди тышкы иштер министри Жээнбек Кулубаев ЖМКлар үчүн брифинг учурунда.
Анын айтымында, президент Садыр Жапаровдун БУУнун башкы катчысы менен сүйлөшүүлөрү жемиштүү аяктады. Садыр Жапаров БУУнун дүйнө өлкөлөрүнүн жана элдеринин басымдуу көпчүлүгүн бириктирген универсалдуу эл аралык уюм экендиги тууралу Кыргызстандын бекем позициясын дагы бир жолу ырастады.
"Биздин өлкө БУУнун Уставынын негизги жоболоруна, ошондой эле Туруктуу өнүктүрүү максаттарын ишке ашырууга жана эл аралык укукка, улуттук кызыкчылыктарга жана конструктивдүү диалогго таянуу менен өлкөнүн жана аймактык деңгээлдеги орун алган көйгөйлөрдү чечүүнү жактайт. Дүйнөдөгү геосаясий чыңалууга байланыштуу эл аралык абал жана күн тартиби боюнча пикир алмаша алдык. Биз башкы катчынын дүйнөдөгү кризистерди жөнгө салуу аракеттерин толук колдой турганыбызды билдиребиз", - деди Кулубаев.
Министр белгилегендей, Борбор Азия өлкөлөрүнүн кызматташуусу жана регионалдык интеграция маселелери боюнча ой алмаштык. Борбордук Азия элдеринин ортосунда саясий өз ара аракеттенүү, соода-экономика жана маданий кызматташуу активдүү өнүгүп жатат. Ири аймактык энергетикалык жана транспорттук долбоорлорду ишке ашыруунун башталышы менен Борбор Азиядагы өз ара колдоо жана соода-экономикалык, инвестициялык кызматташуу сапаттуу жаңы деңгээлге чыгаарына ишенебиз. Ушул негизде Кыргызстандын өкмөтүнүн өлкөдөгү социалдык-экономикалык өнүгүүнү алдыга жылдыруу жана бекемдөө боюнча азыркы иш-чаралары, келечектеги пландары кеңири чагылдырылды. Бүгүн көтөрүлгөн негизги темалардын бири климаттык көйгөйлөр жана Кыргызстандын климат жана тоо күн тартиби боюнча демилгелери болду. Бүгүнкү күндө дүйнө коомчулугу, анын ичинде Кыргызстан да климаттын өзгөрүшүнүн терс кесепеттерине күбө болууда. Биз БУУнун жана пикирлеш мамлекеттер менен биргеликте климаттын өзгөрүшүнө каршы күрөштө тобокелдиктерди азайтуу үчүн бардык мүмкүн болгон чараларды көрүүгө даярбыз жана чечкиндүүбүз.
"Кыргызстан тунгуюк тоолуу өлкө катары тоо күн тартибин глобалдык деңгээлде, биринчи кезекте БУУда активдүү илгерилетүүдө. БУУнун башкы катчысына туруктуу өнүгүү жолунда тоолуу өлкөлөрдүн кызыкчылыктарын коргоо боюнча демилгелер жана иш-чаралар тууралуу кеңири маалымат бердик", - деди Жээнбек Кулубаев.
Кыргызстандын тышкы саясий ведомствосунун башчысы 2022-жыл Тоолорду туруктуу өнүктүрүүнүн эл аралык жылы деп жарыяланганын эске салды. Ошол эле жылы БУУнун Башкы ассамблеясынын резолюциясы кабыл алынып, анын алкагында 2023-2027-жылдары Тоолуу аймактарды өнүктүрүүнүн беш жылдык аракеттери деп жарыяланган. Азык-түлүк жана айыл чарба уюмунун (ФАО) Тоо шериктештигинин катчылыгынын колдоосу менен Глобалдык иш-аракеттер планы иштелип чыгып, Трасттык фондду түзүү боюнча БУУнун Өнүктүрүү программасы менен чогу иштер жүрүп жатат.
"Ошол эле учурда биз климаттын өзгөрүүсүнүн көйгөйлөрүн биргелешип, жалпы күч-аракет менен гана чечүү мүмкүн экенин так түшүнүшүбүз керек. Тоолор жана климаттын өзгөрүүсү боюнча диалогдун Бакуда өтө турган COP29 күн тартибине киргизилиши жана ага ылайык аны БУУнун Климаттын өзгөрүшү боюнча алкактык конвенциясынын (РКИК) кезектеги иш-чарасы катары каралууда. Аталган иш-чаралар БУУнун алкагында тоо күн тартибин алдыга жылдырууга мүмкүндүк берет. Бул багытта кыргыз тарап активдүү иш алып барууда", - деди ал.
Пикир
Оставить комментарий