Бишкек, 18.08.24. /Кабар/. Тоң районунун Ак-Сай айылында сел жүрдү. Бул тууралуу Өзгөчө кырдаалдар министрлигинен билдиришти.
Маалыматка ылайык, бүгүн, 18-августта саат 19:30 чамасында жааган жаандын кесепетинен Тоң районунун Ак-Сай айылынын Жума Жамгырчиев көчөсүндөгү турак үйлөрдү сел каптап жаткандыгы тууралуу маалымат түшкөн.
Жерине Тоң району боюнча өзгөчө кырдаалдар бөлүмүнөн ыкчам топ жана Жарандык коргонуу комиссиясы тартылган.
Ак-Сай айылында сел суулары жалпы 30 үйгө кирип, эки турак үйдөн 7 чоң киши жана 6 жаш бала убактылуу коопсуз жайга эвакуацияланды.
Учурда Тоң райондук N38 өрткө каршы-куткаруу бөлүгүнөн кошумча 20 куткаруучу тартылып, турак үйлөрдөн сел сууларын сордуруу иши жүрүүдө.
Эскерте кетсек, буга чейин Транспорт жана коммуникациялар министрлиги Ысык-Көл облусунун Жети-Өгүз жана Тоң райондоруна катуу жаандан улам өзгөчө кырдаал режими киргизилгенин жана облустун көпчүлүк аймактарында жамгыр катуу жаап жатканын билдирген.
Пикир
Оставить комментарий