Бишкек, 25.02.20. /Кабар/. Тогуз-Торо райондук милициясынын кызматкерлери айылдарды кыдырып, жаш өспүрүмдөрдөн кабар алды. Бул тууралуу Жалал-Абад облустук милициясынан кабарлашты.
Маалыматка ылайык, иш-чара 2020-жыл – Региондорду өнүктүрүү, өлкөнү санариптештирүү жана балдарды колдоо жылына карата өткөрүлдү.
Аймактык участкалык инспекторлор, жашы жете элек өспүрүмдөр менен иштөө инспекциясынын кызматкерлери, жергиликтүү мамлекеттик органдардын өкүлдөрү менен биргеликте район аймагындагы Тогуз-Торо, Атай, Көк-Ирим, Сары-Булуң айыл өкмөттөрүндөгү айылдарга барышты. Алар аз камсыз болгон үй-бүлөлөрдүн, ата-энеси миграцияда жүргөн өспүрүмдөрдүн жашоо-шарты менен таанышып, түшүндүрүү иштерин алып барышты.
Ошондой эле мектептерде ата-энелер жана окуучулар менен жолугушуулар уюштурулуп, үй-бүлөлүк жана өспүрүмдөргө карата зордук-зомбулуктун алдын алууга багытталган жумуштар жүргүзүлдү. Ата-энелерге милиция тарабынан өспүрүмдөрдү ар тараптуу колдоо керектиги айтылып, аларга сабактан сырткары көзөмөл салып туруу зарыл экендиги эскертилди.
Пикир
Оставить комментарий