Бишкек, 04.09.17 /Кабар/. АКШнын президенти Дональд Трамп Пхеньян суутек бомбасын сыноодон өткөргөндөн кийин Түндүк Кореяга карата күч колдонуу ыктымалдыгын жокко чыгарган жок. Ал журналисттин тиешелүү суроосуна «Аны көрөбүз» деп жооп берди.
Президент Твиттердеги баракчасына АКШ Түндүк Корея менен бизнес жүргүзгөн кайсы гана өлкө болбосун, аны менен мамилелерди токтотуу ыктымалдыгын караштырып жатканын жазды.
АКШнын финансы министри Стивен Мнучин Пхеньянга каршы жаңы санкциялардын топтомун алып чыгуу ниетин билдирди. Ал Fox News телеканалына берген маегинде Трампка кайрылып, президенттен Түндүк Корея менен сооданы токтотуу маселесин олуттуу карап чыгууну өтүндү.
Орусиянын президенти Владимир Путин менен Кытайдын лидери Си Цзиньпинь жеке жолугушуусу маалында Корей жарым аралында өзөктүк куралды жок кылуу керектигин белгилешти. Путин ошондой эле аймактагы абалды телефон аркылуу Жапониянын премьер-министри Синдзо Абэ менен дагы талкуулады. Анын жүрүшүндө тараптар Түндүк Кореянын бомбаны сыноодон өткөрүшүн айыпташты.
Мурдараак Түштүк Корея бийлиги Пхеньянды толугу менен изоляция кылуу үчүн БУУнун Коопсуздук кеңеши Түндүк Кореяга каршы жаңы санкцияларды киргизиши керектигин билдирген.
3-сентябрда Түндүк Корея суутек бомбасын ийгиликтүү сыноодон өткөргөнүн жарыялаган. Өлкөнүн Борбордук телеберүүсү ал континенттер аралык баллистикалык ракеталарга орнотууга арналганын билдирди.
Булагы: CENTRAL ASIAN
Пикир
Оставить комментарий