Бишкек, 18.03.22. /Кабар/. КР Улуттук коопсуздук мамлекеттик комитети (УКМК) бардык деӊгээлдеги мамлекеттик, муниципалдык кызматкерлердин жогорку билими тууралуу дипломунун аныктыгын текшерүү ишин улантууда. Бул тууралуу ведомствонун басма сөз кызматы билдирет.
Иштин жыйынтыгында ар бир аныкталган фактылар боюнча мыйзамдарга ылайык тийиштүү процессуалдык чечим кабыл алынат.
"Ошондой эле айрым жарандык активисттер менен Жогорку Кеӊештин депутаттарынын, алардын катарында А.Мадумаровдун, улуттук коопсуздук органдарынын бул ишине терс маани берүү аракети байкалууда", - деп айтылат маалыматта.
УКМКдан белгилешкендей, топтолгон материалдарга жүргүзүлгөн алдын ала талдоо көрсөткөндөй, бул тармактагы мыйзам бузууларды төмөнкүдөй топторго бөлүүгө болот:
1. Мамлекеттик билим берүү стандартынын талаптарын аткарбоого (жогорку окуу жайы менен байланыштын жоктугу, чет өлкөдө жүрүү, зачёт, сынактарга барбоо ж.б.) байланыштуу билим берүү мыйзамдарын бузуп, жогорку билим жөнүндө диплом алган адамдар. Мисал катары “Бүтүн Кыргызстан” партиясынан Жогорку Кеӊештин мурунку депутаты О.Нарматованын ал Жалал-Абад мамлекеттик университетиндеги сынак сессиясы учурунда чет өлкөдө узак убакыт жүргөн окуяны келтирсек болот.
2. Жогорку окуу жайга баштапкы билими жөнүндө жасалма документ (орто билими жөнүндө аттестат, академиялык маалым кат ж.б.) тапшырган адамдар. Мисал катары “Бүтүн Кыргызстан” партиясынан Жогорку Кеӊештин депутаттыгына талапкер Кыянбек Сатыбалдиевдин айланасындагы абалды келтирсе болот. Ал жасалма документтердин негизинде Жалал-Абад экономика жана ишкердик университетине тапшыргандыгы текшерүүлүдө.
3. Ишке орношуу үчүн, ошондой эле тездетилген программа боюнча экинчи жогорку билим алуу максатында жогорку билим жөнүндө жасалма диплом колдонгон адамдар. “Бүтүн Кыргызстан” партиясынан Жогорку Кеӊештин депутаттыгына талапкер Жолдошбек Осмонбекович Токсобаев жасалма дипломун колдонуу фактысын атаса болот.
Билими жөнүндө жасалма документтерди даярдаганга катыштыгы бар тийиштүү окуу жайлардын кызматкерлерине мыйзамдарга ылайык юридикалык баа берилет.
"Ушуга байланыштуу текшерүүлөрдү жүргүзүүдө тандоо ыкмасы жөнүндө айтылган сөздөр чындыкка дал келбейт жана улуттук коопсуздук органдарынын иш-аракеттеринин айланасында терс көрүнүш түзүү аракеттерин жана мындай материалдарга саясий коннотация берүү, соттолуучуларды жоопкерчиликтен четтетүү каалоолорун көрсөтөт", - деп билдиришти УКМКдан.
КР Улуттук коопсуздук мамлекеттик комитети дипломдорду текшерүүгө байланыштуу кандайдыр бир комментарий берүүдөн, текшерүү аяктап жыйынтыгын расмий түрдө жарыялаганга чейин карманууну суранат.
Пикир
Оставить комментарий