Бишкек, 01.08.24. /Кабар/. Ысык-Көлдө дайынсыз жоголгон эки жаран изделүүдө. Бул тууралуу Өзгөчө кырдаалдар министрлигинен билдиришти.
Маалыматка караганда, ӨКМге 1-августта саат сегиздер чамасында Кызыл-Суу айылынын С.Г. аттуу 73 жаштагы тургунунун бут кийими Чоң-Кызыл-Суу суусунун жээгинен табылып, өзү дайынсыз болуп жаткандыгы тууралуу маалымат келип түшкөн.
Жерине Жети-Өгүз районунун Өзгөчө кырдаалдар бөлүмүнөн 1 дрон аппараты менен 15 куткаруучу, 14 милиция кызматкери жана жергиликтүү тургундардан 15 адам тартылган. Учурда издөө иштери жүрүүдө.
Ошондой эле 29-июлдан бери Түп районунун Ынтымак айылынын тушундагы көлдүн жээгинде эс алып жүрүп, дайынсыз болгон Чүй облусунун 46 жаштагы М.С. аттуу жашоочусу изделүүдө.
Бүгүн ӨКМдин Каракол шаары боюнча өзгөчө кырдаалдар бөлүмүнөн 5 куткаруучу, 6 милиция кызматкери издөө жумуштарын жүргүзүп жатат.
Пикир
Оставить комментарий